DILI, 17 janeiru 2023 (TATOLI) – Governu ezekuta ona, iha semana datoluk fulan ne’e, Orsamentu Jerál Estadu (OJE) 2023 ho montante $282.535, informa Vise-Ministru Finansa, António Freitas, hafoin hasoru malu ho Primeiru-Ministru, Taur Matan Ruak, hodi relata progresu servisu ministériu nian, liuliu ezekusaun orsamentál.
“Totál ezekusaun OJE 2023 to’o tersa ho montante $282.535. Ne’e seidauk inklui saláriu fulan ida ne’e nian, tanba loron 20 ba leten mak halo pagamentu”, Vise-Ministru hateten hafoin hasoru malu ho Xefe Ezekutivu, iha Palásiu Governu.
Ezekusaun ne’e mai hosi Gabinete Prezidente Repúblika ho montante rihun $250, Servisu Nasionál Intelejénsia (SNI) hamutuk rihun $29 no Institutu Defeza Nasionál (IDN).
Antes ne’e, Parlamentu Nasionál aprova ona, iha loron 17 novembru 2022, proposta-lei númeru 46/v (5a) OJE 2023 billaun $3,16 iha finál globál no iha loron tuirmai haruka kedan ba Prezidente Repúblika, José Ramos Horta.
Proposta-lei ne’e kompostu hosi orsamentu administrasaun sentrál biliaun $2,8 (montante ne’e inklui ona Fundu Kombatente Libertasaun Nasionál biliaun $1), orsamentu seguransa sosiál millaun $235,7 no Rejiaun Administrativa Espesiál Oé-Cusse Ambeno (RAEOA) millaun $120.
Maibé, antes halo promulgasaun ba proposta ne’e, Xefe Estadu hato’o pedidu ba Tribunál Rekursu hodi halo fiskalizasaun preventiva ba fundu veteranu no ikus mai desizaun Tribunál fó sai katak fundu ne’e inkonstituisionalidade.
Nune’e iha dezembru tinan kotuk, Prezidente Repúblika promulga lei OJE ne’e hosi montante inisiál biliaun $3,16 ba iha biliaun $2-resin.
Orsamentu ne’e atu finansia programa 45 liuhosi atividade prinsipál 275, organizadu iha área estratéjiku 16 ne’ebé Governu sei foku ba iha tinan oin hanesan agrikultura, pekuária, peska no Floresta, ekonomia no empregu, turizmu, dezenvolvimentu rurál no abitasaun, ambiente, petróleu no minerál, eletrisidade no enerjia renovável, konektividade nasionál, bee no saneamentu, edukasaun no formasaun, saúde inkluzaun no protesaun sosiál, kultura no patrimóniu, reforma Estadu, defeza no seguransa nasionál, relasaun internasionál no polítika esterna.
Notísia relevante: MF atribui pakote OJE 2023 no halo abertura sistema GRP
Jornalista: Antónia Gusmão
Editora: Maria Auxiliadora
