Top

PN aprova votu pezár ba falesimentu Shirley Shackleton

Shirley Shackleton. Imajen/Espesiál.

DILI, 30 janeiru 2023 (TATOLI)—Parlamentu Nasionál (PN), segunda ne’e, liuhosi reuniaun plenária aprova votu pezár ba falesimentu Shirley Shackleton hodi hato’o sentidu profunda kondolénsia.

Notísia Relevante: Xanana Gusmão triste ba falesimentu Shiley Shackleton

“Rezultadu votasaun a-favór 41, kontra no abstensaun 0, votu númeru 2/2023 aprova,” Prezidente Parlamentu Nasionál, Aniceto Longuinhos Guterres Lopes, fó sai iha iha sala plenária PN.

Shirley Shackleton hakotu iis iha loron 15 janeiru tinan 2023, iha Melbourne-Austrália, hafoin enfrenta moras kle’ur.

Shirley Shackleton, moris iha loron 26 fulan-dezembru tinan 1931 iha Plympton, Adelaide-Austrália.

Matebian Shirley Shackleton nia nia la’en, Greg Shackleton, nu’udar jornalista Australianu ne’ebé inimigu oho iha Balibó, iha loron 16 fulan-outubru tinan 1975, hamutuk ho jornalista na’in-haat seluk.

Shirley husik ninia vida hodi defende autodeterminasaun povu timoroan nian no luta ba lia-loos kona-ba sirkunstánsia oho jornalista na’in-lima ne’e.

Shirley Shackleton hanesan Diretora ba Balibó House Trust, organizasaun ida-ne’ebé nia ajuda ona hodi estabelese, responsavél ba rekuperasaun Australian Flag House, ba projetu sosiál oioin iha Balibó no ne’ebé fó omenajen memória jornalista na’in-lima ni’an australianu Greg Shackleton no Tony Stewart, britániku Malcolm Rennie no Brian Peters no mós neozelandés Gary Cunningham.

Iha tinan 2010, nia hakerek ona livru “Sírkulu Silénsiu: Testemuñu Pesoál Molok, Durante no Hafoin Balibó”.

Iha tinan 2013, hanesan rekoñesimentu ba ninia kontributu ne’ebé boot ba benefísiu Timor-Leste no timoroan nian, Shirley kondekora ona ho medalla orden Timor-Leste.

Nune’e, PN liu hosi sesaun plenária manifesta profundu pezár ba falesimentu Shirley Shackleton no sentidu kondolénsia ba ninia família.

Votu pezár ne’e aprezenta hosi Deputadu proponente Maria Angelina Sarmento (PLP), David Dias Ximenes ‘Mandati’ (FRETILIN) ho Deputadu Mariano Assanami Sabino (PD).

Deputadu Mandati, konsidera merese duni PN fó votu pezár ne’e ba kontribuisaun hotu ne’ebé iha.

Jornalista : Nelson de Sousa

Editór       : Cancio Ximenes

Publisidade

Leave a Reply

Latest Post

error: Content is protected !!