PN husu MEJD investiga implementasaun bolsa méritu tanba iha manipulasaun
DILI, 30 janeiru 2023 (TATOLI)–Menbru Parlamentu Nasionál (PN) husu Ministéiru Edukasaun Juventude no Desportu (MEJD), atu halo investigasaun urjente ba prosesu implementasaun programa bolsa méritu ne’ebé deskonfia mosu manipulasaun.
Notísia Relevante: Komisaun G simu lamentasaun kona-ba bolsa méritu hosi diretór edukasaun
“Polítika ida bolsu méritu ne’e, atu motiva timoroan sira atu bele kualifika sira-nia an. Maibé realidade mosu preokupasaun barak hosi komunidade, liu-liu iha eskola balun sira katak ida-ne’e kria injustisa iha ne’eba. Nune’e se bele karik, Ministéiru Edukasaun tenke bolu ona urjentemente Diretór Edukasaun munisipál sira atu bele implementa ka sensibiliza didi’ak lei ne’e oinsá atu bele implementa bolsu méritu ne’e,” Deputadu Fretilin, Gabriela Alves, levanta liu hosi reuniaun plenária PN, segunda ne’e.
Nia dehan, liuhosi investigasaun mak bele hatán ba implementasaun bolsu méritu ne’ebé daudaun ne’e sai polémika, tanba diretór sira mós dalaruma la intende.
Deputadu PLP, Noé da Silva, hateten programa bolsa méritu hosi Governu atu atribui ba estudante ne’ebé hetan klasifikasaun di’ak maibé simu lamentasaun hosi komunidade.
“Ha’u simu informasaun balun, hosi inan-aman sira-ne’ebé nia oan hetan klafisikasaun di’ak iha eskola Amigo de Jesus Taibessi, nia hetan primeiru klasifikadu maibé nia la konsege hetan bolsa méritu ne’e, iha eskola nia matenek,” nia dehan.
Deputadu hosi bankada Governu ne’e hateten, bainhira simu informasaun ne’e hakarak konfirma ho ministéiru problema ne’e tanbasá, nune’e presiza hetan esplikasaun hosi MEJD.
Asuntu hanesan, hato’o mós hosi Deputadu PLP, Domingas dos Santos, simu informasaun hosi komunidade katak situasaun hanesan estudante ne’ebé hetan klasifikasaun antes ne’e di’ak maibé ikus mai naran laiha fali no iha fali mak sira-ne’ebé la hetan klasifikasaun.
Jornalista : Nelson de Sousa
Editór : Cancio Ximenes
