DILI, 31 janeiru 2023 (TATOLI) – Ministru Turizmu, Komérsiu no Indústria (MTKI), José Lucas do Carmo da Silva, esplika razaun Governu prolonga tempu ba distribuisaun sesta bázika to’o 30 maiu tanba empreza distributór sira difísil hetan produtu lokál.
Tuir kritéria, distribuisaun sesta bázika 75% tenke mai hosi produtu lokál ka produtu rai-laran.
Empreza ne’ebé mak ministériu kontrata hodi distribui sesta bázika hamutuk 94, husi númeru ne’e 50-resin mak distribui ona no ba empreza seluk ne’ebé seidauk distribui, Governu mós halo ona prolongamentu tempu ba sira.
“Problema saida mak halo hodi Governu estende distribuisaun maka produtu lokál ne’e sai preokupasaun, maski ministériu implementadór sira ejize tenke lalais, maibé mensajen hosi empreza distributór sira katak presiza tempu para sira buka produtu lokál. Tanba ne’e mak Governu deside estende hodi fó espasu ba sira para bele halo hotu distribuisaun ne’e hodi kumpre kritériu ne’ebé Governu fó katak uza produtu lokál iha sesta bázika”, José Lucas hatete iha Programa Entrevista Eskluziva iha estúdiu Agência TATOLI, iha Faról.
Ligadu ho preokupasaun públika nian kona-ba sesta bázika dala barak empreza fó sasán aat ba komunidade, governante ne’e apela ba públiku katak bainhira hasoru situasaun hanesan ne’e informa lalais ba ministériu.
“Fó hatene ba públiku katak emprezáriu sira halo esforsu atu kumpre kontratu ho MTKI ba distribuisaun [sesta bázika]. Karik empreza distribuidór sira mak lahalo tuir kontratu sei hetan penalidade”, nia dehan.
Tanba ne’e maka MTKI aplika ona penalidade ba empreza lubuk ida ne’ebé ministériu simu ona rekomendasaun hosi instituisaun fiskalizadór hanesan Komisaun Anti-Korrupusaun (KAK) no Provedoria Direitu Umanu no Justisa (PDHJ). Ikus mai, ministériu halo redusaun ba sira-nian pagamentu kiik liu mak rihun $2 no boot liu rihun $100.
“Ida ne’e akontese katak ami halo duni redusaun ba sira-nian pagamentu. Atu fó hatene ba públiku katak ministériu iha regra rigorosa no sira rasik mak konkorda liuhosi kontratu ne’ebé parte rua asina molok distribui. Kuandu lahalo tuir mak iha redusaun ba pagamentu finál. Antes sira distribui, ami husu ba sira katak halo bazeia de’it ba kriteria sira ne’ebé mak tau iha kontratu”, nia realsa.
Ministru relata dezafiu ne’ebé durante ne’e hasoru mak laiha lista presu ba produtu lokál, distánsia populasaun nia hela fatin no klima nb ladi’ak hodi afeta ba prosesu distribuisaun.
MTKI iha osan hamutuk millaun $40 ba implementa programa refere, hosi totál ne’e ezekuta ona millaun $20,37 hodi selu empreza 58.
Área ne’ebé MTKI responsável mak iha munisípiu Dili, Liquiçá, Ermera, Bobonaro no Rejiaun Administrativa Espesiál Oé-Cusse Ambeno (RAEOA). Sidadaun ne’ebé benfisia ona ba programa ne’e hamutuk 57% no hela 43%.
Notísia relevante: Governu estende distribuisaun sesta bázika to’o 30 maiu
Jornalista: Antónia Gusmão
Editora: Maria Auxiliadora
