FRETILIN husu aumenta sentru votasaun hakbesik ba povu

DILI, 31 janeiru 2023 (TATOLI)—Vise bankada Frente Revolsionária Timor-Leste Indepedente (FRETILIN) iha Parlamentu Nasionál (PN), Antoninho Bianco, husu Governu atu aumenta no estabelese sentru votasaun no estasaun votu iha eleisaun parlamentár 2023 hodi hakbesik ba povu bele ba vota.
Notísia Relevante: Eleisaun lejislativa: STAE sei estabelese sentru votasaun 237-estasaun votasaun 320-resin
“Bankada kuaze husu tenke hakbesik sentru no estasaun votu ba povu, tanba situasaun agora kondisaun jeográfika uluk sai fali hanesan ema nia razaun la ba vota. Entaun sentru no estasaun votasaun ba kraik besik liu, nune’e ema labele dehan razaun dook,” Deputadu Bianco hateten ba Agência Tatoli iha PN, tersa ne’e.
Tanba ne’e, liuhosi audiénsia públika alterasaun lei eleitorál ba Parlamentu Nasionál ne’e, bankada rekomenda ona atu parte Governu aumenta sentru votasaun no estasaun votasaun ba povu, no presiza aumenta pesoal brigadista sira no rekruta ofisiál eleitorál hodi hasa’e taxa partisipasaun eleitór sira-nian ba vota iha eleisaun parlamentár 2023.
Nia hato’o nia hanoin iha audiénsia públika ba alterasaun lei Eleitorál ba PN ligadu ho bulletin n votu prodús tuir bandeira ne’ebé iha labele tau ema nia oin ne’ebé iha ona lei eleitorál ba PN, tanba tempu liu ba buletin votu prodús tau fali ema nia oin, ne’ebé bankada parlamentár sira kuaze konkorda ida-ne’e.
Kona-ba alterasaun lei ne’e Governu atu estabelese postal voting iha diáspora, Deputadu hosi bankada Governu ne’e hato’o ona iha audiénsia hodi rekomenda ba Governu atu haree ba fatin iha nasaun sira seluk hanesan Austrália, Portugál, Inglaterra ho sira seluk presiza iha koordenasaun di’ak tanba kestaun fatin no asuntu tékniku sira seluk.
“Ita hein katak, ida-ne’e uluk hala’o ona sira bele hala’o kontinuasaun. Agora kestaun mak oras tanba ita-nian hahu eleisaun iha ne’e, sira-nian toba ka hadeer tiha, entaun ne’e mak halo adaptasaun nune’e iha tempu votasaun sira bele ba konsidera ezerse sira-nia votu,” nia dehan.
Iha alterasaun lei Eleitorál ba PN Governu hato’o mós alterasaun atu estabelese sentru votasaun paralelu iha munisípiu Dili.
Nune’e, órgaun eleitorál no entidade relevante sira presiza halo sensibilizasaun liután hasa’e koñesimentu eleitór, tanba liga ho esperénsia eleisaun prezidensiál 2022 mosu lamentasaun barak.
Iha lei ne’e konsidera mós negosiante sira bainhira okupadu ho serbisu la fila ba munisípiu bele vota iha sentru paralelu, ho mós eleitór ho razaun médiku ka moras no ba estudante sira.
Tan ne’e, bainhira prosesu fó sai atualiza naran iha alterasaun lei ne’e sei ba direta iha Sekretáriadu Tékniku Administrasaun Eleitorál (STAE) hodi rejista.
Bankada FRETILIN mós defende katak alterasaun ne’e kria artigu espesífiku ba ema ho defisiénsia oinsá Governu bele kria kondisaun ba sira.
“Iha hotu agora, kestaun kapasidade tanba buat ne’e tékniku ba ema defisiénsia hanesan matan hodi fasilita sira partisipa di’ak iha eleisaun ho inkluzivu liután,” nia hateten.
Jornalista : Nelson de Sousa
Editór : Cancio Ximenes

