BAUCAU, 31 janeiru 2023 (TATOLI) – Sekretariadu Tékniku Programa Nasionál Dezenvolvimentu Suku (PNDS) tersa ne’e, inagura Uma Naroman Ba Suku (UNP) hamutuk sia iha aldeia Lequeloiwatu, suku Triloka, postu administrativu Baucau vila.
Sekretária Ezekutiva Programa Nasionál Dezenvolvimentu Suku (PNDS), Claudina Soares Pinto, esplika, alterasaun dekretu-lei dahaat estatutu PNDS númeru 8/2013 ne’ebé transforma naran Uma Kbiit Laek (UKL) ba Uma Naroman ba Povu nune’e governu kontinua implementa programa refere iha tinan 2023 ne’ebé suku Triloka sei konstrui tán uma tolu iha tinan 2023.
“Suku Triloka sai hanesan suku dahuluk ita halo inaugurasaun hosi uma hamutuk 500-resin iha munisípiu Baucau, ohin suku ne’e reprezenta halo inaugurasaun ba atividade uma naroman ba povu,” Sekretária Ezekutiva PNDS hateten iha aldeia Lequiloiwatu, tersa ne’e.
PNDS louva ho autoridade suku Triloka tanba bele implementa programa PNDS hanesan UKL + B, reabilitasaun sede suku no UNP faze daruak ho sussesu no kontinua husu atu kolabora hamutuk hodi fó susesu ba programa PNDS iha tinan-2023.
Xefe suku Triloka, Alexandre da Costa, sente kontente tanba goovernu konsege rezolve fazeadamente kondisaun uma ba komunidade iha suku Triloka tanba kondisaun dignu hodi hamahan-aan.
“Apela ba benefisiáriu sira atu kuida uma ho responsabilidade nune’e utiliza hodi hela ba durasaun tempu naruk,” Xefe suku fó hanoin.
Orsamentu ne’ebé restu ba kustu infarestrutura hamutuk $19.000 nune’e autoridade suku deside sosa materiál uma hanesan ekipamentu dapur, kama, kulisaun, meza, kadeira inklui almáriu ba uma ne’e.
Benefisiáriu na’in-sia refere mai hosi aldeia tolu hanesan aldeia Macadae, Baduho’o no Lequeloiwatu.
Benefisiáriu na’in-sia ne’e mak hanesan Faustina Freitas, Virgílio Bosco da Silva, Domingos Freitas, Ricardo da Silva, João Cancio Ximenes, Luisa da Silva, Maria Freitas, Josefina da Conceição no Luiges da Silva ne’ebé komposta hosi feto faluk na’in-ida no na’in-ualu seluk kategoriza vulnerável no defisiente.
Suku Triloka hetan alokasaun orsamentu hosi UKL tinan 2022 hamutuk $159.318 ne’ebé fahe ba kategória fundu infraestrutura $153.306 no fundu operasionál $6.012.
Entretantu, autoridade munisipál Baucau hetan alokasaun orsamentu hosi programa UKL hamutuk tokon $1,802,000. Hosi totál ne’e finánsia ba atividade fíziku hamutuk tokon $1,734,000 ba suku 34 no despeza operasional $ 68,000 sei gastu iha munisipál Baucau.
Notísia relevante: Benefisiáriu iha Triloka konsidera Uma Naroman ba Povu benefísia direita povu
Jornalista : Natalino Belo
Editór : Evaristo Saores Martins
