DILI, 01 fevereiru 2023 (TATOLI)– Governu aprova kalendáriu operasaun ba resenseamentu eleitorál iha rai-li’ur ne’ebé aprezenta husi Ministru Administrasaun Estatál (MAE), Miguel de Carvalho.
Ho aprovasaun kalendáriu ne’e, formasaun ba membru sira Komisaun Resenseamentu Eleitorál sei hala’o iha loron 22 to’o 23 fevereiru.
“Inskrisaun ba resenseamentu eleitorál sei hala’o entre loron 24 fevereiru no 24 fulan-marsu. Elaborasaun, extrasaun no remesa ba lista eleitór sira, liuhusi via eletrónika, husi misaun diplomátika sira no postu konsulár ida-idak sei hala’o iha loron 25 to’o 26 marsu”, Ministru Prezidensia Konsellu Ministru, Fidélis Magalhães, informa hafoin reuniaun Konsellu Ministru, iha Palásiu Governu.
Nia dehan, períodu espozisaun no reklamasaun ba lista eleitór sira ne’ebé hela iha rai-li’ur ne’e define ba períodu husi 27 to’o 31 marsu no sinkronizasaun sistema resenseamentu eleitorál sei hala’o entre loron 1 no 11 abril.
“Ikusliu, númeru sira ne’ebé inskritu iha resenseamentu eleitorál tenke publika to’o loron 12 fulan-abril tinan 2023”, nia konklui.
Relembra katak resenseamentu eleitorál iha rai-laran lansa ona iha 17 janeiru ne’e.
Ministru Miguel de Carvalho apela, iha ámbitu lansamentu atividade ne’e, ba partidu polítiku sira atu informa nia militante sira sobre nesesidade atualiza dadus no ba integrante foun sira atu resensea.
Iha sorin seluk, Diretór-Jerál STAE, Acilino Branco, hatete resenseamentu mak fundamentál atu sidadaun bele ezerse nia direitu votu. Nia husu mós ba abitante sira ne’ebé seidauk halo resenseamntu atu hakbesik ba postu administrativu sira.
Númeru eleitór to’o iha dezembru 2022 hamutuk 878.712 ne’ebé kompostu hosi Aileu 34.706, Ainaro 46.945, Ataúro 2.600, Baucau 98.629, Bobonaro 72.811, Cavalima 48.830, Dili 192.934, Ermera 84.361, Lautém 49.380, Liquiçá 51.925, Manatuto 35.999, Manufahi 41.574, RAEOA 53.151 no Viqueque iha eleitór hamutuk 58.867.
Nune’e mós, eleitór ne’ebé agora resensiadu no atualizadu iha diáspora hamutuk 6.944 ne’ebé kompostu hosi Austrália iha eleitór 1.462, Korea Súl 1.237, Irlandia do Norte 2.185, Portugál 1.241 no Reinu Unidu iha 819.
Jornalista: Antónia Gusmão
Editora: Maria Auxiliadora
