COVALIMA, 01 fevreiru 2023 (TATOLI)–Diretór Nasionál Operasaun Autoridade Aduaneira, Armindo dos Santos, hateten Governu hasa’e taxa iha limitasaun presu sasán iha merkadu sa’e tanba importadór mak manipula presu.
Notísia Relevante: PN aprova OJE 2023 hasa’e taxa impostu seletivu ba konsumu nian
“Aplika taxa foin lalais ne’e ita limitasaun la’ós ba buat hotu, presu sasán sa’e tanba ita-nia importadór halimar buat sira-ne’e,” Armindo dos Santos informa ba jornalista sira, iha fronteira Salele, kuarta ne’e.
Tuir lei Orsamentu Jerál Estadu (OJE) tinan 2023, nia dehan, Governu hasa’e taxa ba sasán ne’ebé mak kontajen hanesan masin-midar, bebida asukarada hanesan Cocacola, Ssprite tanba ema barak konsumu ida-ne’e hetan moras diabetes ka raan midar.
Tanba liuhusi doutór sira-nia diagnostika haktuir katak, ema konsumu masin-midar, bebida asukarada Cocacola no Sprite ne’e fó impaktu moras ba sidadaun sira, entaun Governu deside hasa’e taxa.
“Atu evita sidadaun sira hemu demais buat midar, iha parte balun ita hasa’e taxa ne’e mós ita aumenta taxa 2,5% hamutuk 5% sa’e uitoan, ita-nia importadór mak halo estipula sasán hodi folin sa’e,” nia esplika.
Ho nune’e, Governu halo ona kontrolu liuhosi ekipa-ida ba sira-nia armajen no sei haree mós loja sira faan sasán ho presu sai hosi ida-ne’e tenke hetan sansaun.
Governu hasa’e taxa la’ós ba item hotu, tanba hasa’e taxa item haat de’it mak hanesan no molok ne’e aplika taxa 5%, Sales Tax taxa 2,5, import duty 2,5 hamutuk 5%, maibé haree ba dezenvolvimentu mudansa Governu deside aumenta import duty ne’e ba 5% sales tax 2,5 hamutuk 7,5% aumenta excise tax.
Kona-ba karreta, sira-nia sa’e tanba karreta la’ós ema baibain sira mak sosa loro-loron, nune’e a atu han ema iha osan mak bele sosa.
Taxa ba nesesidade bazika ne’e 2,5%, maibé tanba istipulasaun merkadu mak halo manipulasaun presu halo komunidade hakfodak no sosa mós dada iis la to’o.
Antes ne’e, iha loron 07 fulan-novembru 2022, Ministru Finansas, Rui Augusto Gomes, hateten Governu hasa’e impostu ba tabaku $100 kada kilograma inklui produtu seletivu seluk.
Notísia Relevante: PN aprova taxa seletivu tabaku hasa’e ba $50
Jornalista : Celestina Teles
Editór : Cancio Ximenes
