iklan

DILI, POLÍTIKA

PN aprova OJE 2023 hasa’e taxa impostu seletivu ba konsumu nian

PN aprova OJE 2023 hasa’e taxa impostu seletivu ba konsumu nian

Diskusaun no votasaun proposta orsamentu OJE, 2023 iha sala plenáriu PN, kuarta (16/11/2022) Imajen Tatoli/António Daciparu

DILI, 17 novembru 2022 (TATOLI)—Parlamentu Nasionál (PN) aprova proposta-lei Orsamentu Jerál Estadu (OJE) 2023 ne’ebé previstu hodi hasa’e taxa impostu seletivu ba konsumu nian.

“Artigu 3 (proposta-lei OJE 2023), rezultadu votasaun a-favór 40, kontra 10 no abstensaun 11, nune’e proposta ne’e pasa,” Prezidente PN, Aniceto Longuinhos Guterres Lopes, hateten iha debate proposta OJE 2023 iha espesialidade iha PN, kinta ne’e.

Iha proposta-lei OJE 2023 iha artigu 3  (Impostu, taxa no kontribuisaun) iha númeru 5 hateten  katak durante iha tinan 2023, taxa impostu seletivu komsumu aplikavel.

Hanesan PPL 2023 ne’e, prevee alterasaun balun iha taxa impostu seletivu ba konsumu, kompara ho saida ne’ebé define iha OJE 2022 nian, liu-liu masin-midar no produtu konfeitaria ba oin sei iha taxa impostu $1 ba kilograma ida, bee kahur ho masin-midar ka edulkorante ka aroma seluk, no bebida sira lahó alkolika, la inklui sumu ai-fuan ka produtu ortikultura ba oin sei iha taxa impostu $3 ba litru ida.

Nune’e mós, valór taxa impostu atu aplika ba tabaku no produtu seluk mai hosi tabaku, ba oin sai hosi $50 kada kilograma ba $100 kada kilograma.

Karreta sira ho ninia valór aas liu $10.000, ba oin sei iha taxa impostu 10% no karreta sira-ne’ebé ho ninia valór aas liu $25.000 ne’e ba oin sei iha taxa impostu 25%, no karreta sira-ne’ebé ho ninia valór aas liu $50.000 sei iha taxa impostu 30%.

Iha debate ne’e, deputadu António Verdiál de Sousa, Irene Gonzaga (KHUNTO), Bernardo Quintão (PLP) hato’o proposta númeru 1 atu elimina aumenta taxa ba karreta ho justikasaun impostu kona-ba automovel eliminia, diminui persantejen ne’ebé selu viatura pasajeiru ho forma ne’e mellora automovel Timor-Leste kualidade vida sidadaun mellora ambiente ekonomia nasaun.

António Verdiál hateten, hasa’e taxa importasaun ba automovel setór privadu, povu husu VIII  Governu Konstitusionál tenke tetu halo didi’ak.

Polítika hasa’e taxa ne’e di’ak maibé oinsá ho rendimentu ki’ik bele sosa ka lae, tanba tinan oin hanesan tinan polítiku nune’e presiza haree implikasaun.

“Governu ho asumsaun ne’ebé aumenta karga fiskál ne’ebé la’o hela hetan aumenta hosi reseita doméstika la’ós petrolíferu iha 2023, nune’e muda komportamentu komunidade maibé la aprezenta mai PN kalkulasaun hosi impaktu medida foun fiskál no reseita doméstika likida laiha ajustamentu iha konsikuénsia,” nia dehan.

Proponente proposta númeru 2, Deputada Maria Angelina Sarmento, hateten sira pretende atu elimina alínea sira hotu kona-ba masin midár, bee sira ne’ebé asukarada, serveza, alkólika no automovel.

“Ami hanoin atu elimina ho razaun tanba iha komisaun C ninia relatóriu hato’o preokupasaun introdús taxa foun impostu iha konsumu iha 2023. Ami hein katak ida-ne’e bele impulsiona reforma sira iha sistema kobransa impostu nian, ita hatene ita investe osan boot iha reforma tributária nian kuaze gasta millaun $14. Agora ita kontinua fó kontinuidade ida-ne’e maibé to’o agora ita laiha rezultadu. Buat ida-ne’ebé ita hanoin mak implementa reforma tributária ne’e,” nia hateten.

Ministru Finansa (MF), Rui Augosto Gomes, hateten parte Governu la aseita ho proposta rua ne’e no intensaun Governu nian atu hasa’e taxa impostu hodi rekolla reseita liután ba Estadu.

Antes ne’e, iha debate jeneralidade, Ministru Finansa, Rui Augusto Gomes, hateten Governu propoin iha OJE 2023 hodi hasa’e impostu ba tabaku $100 kada kilograma inklui produtu seletivu seluk.

“Governu introdús alterasaun balun hanesan impostu ba tabaku, ne’ebé iha tinan ida-ne’e $50 kada kilograma, Governu propoin atu hasa’e ba $100 kada kilograma. Ida-ne’e sei kontribui ba reseita doméstika no sei proteje sidadaun sira-nia saúde,” nia hateten.

Maske hasa’e ona impostu maibé konsidera kiik kompara ho nasaun seluk hanesan Austrália ne’ebé $1.540 kada kilograma, Singapura $304 no Indonézia aplika entre $38 to’o $334.

“Karik Parlamentu hakarak hasa’e to’o $300 kada kilograma, Governu sei simu ho kontente loos,” nia dehan.

Governu mós aplika impostu ba karreta importadu, ne’ebé daudaun ne’e iha diskriminasaun balun.

“Hahú karreta sira-ne’ebé ninia folin $10.000 ba leten sei aplika impostu 10%, karreta sira ne’ebé $25.000 ba leten aplika 20%, karreta sira ne’ebé $50.000 ba leten sei aplika 30%, ne’ebé progresividade iha impostu ba karreta sira-ne’ebé ita sei importa,” ministru ne’e informa.

Governu mós konsidera importánsia ba saúde públika, tanba ne’e taxa impostu ba masin-midar sei tau $1 kada kilograma inklui bebida midar $3 kada litru.

“Ida-ne’e ho intensaun atu proteje sidadaun sira-nia saúde. Governu liuliu Ministériu Saúde ninia programa ne’ebé la’o daudaun ne’e atu hamenus masin-midar iha labarik sira tanba estraga ema-nia saúde,” governante ne’e esplika.

Governu propoin mós atu hasa’e taxa importasaun  hosi 2,5% ba 5%, nune’e Ministru iha esperansa katak ho aumentu sira-ne’e bele aumenta reseita doméstika hosi millaun $153,7 ba millaun $174 ho kresimentu sa’e 13,8%.

Introdusaun impostu hirak ne’e nu’udar instrumentu fiskál ne’ebé Governu uza atu hasa’e koleksaun reseita doméstika iha tinan hirak ba oin hodi redús dependénsia ba fundu minarai.

Aleinde ne’e, introdusaun ne’e aliña ho polítika reforma fiskál no jestaun finansa públika ne’ebé hanesan ajenda reforma importante ne’ebé inisia hosi Governu anteriór, nune’e VIII Governu Konstitusionál komprometidu atu kontinua implementa.

VIII Governu Konstitusionál liuhosi Ministériu Finansa dezde tinan 2018 halo ona modernizasaun ba sistema administrasaun tributária atu hasa’e kolesaun reseita doméstika.

Entertantu iha observasaun deputadu sira seluk nia intervensaun ba proposta rua ne’e iha deputadu balun aseita ho proposta rua ne’e, maibé iha balun mós la aseita no apoiu polítika Governu hodi hasai taxa impostu ne’e.

Hafoin hetan esplikasaun hosi Governu, proponente sira deside retira proposta no husu Governu atu konsidera oinsá aselera lori  proposta lei tributária, aselera diskusaun no kontrola sigaru hatama ilegál hosi fronteira terrestre.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!