DILI, 02 fevereiru 2023 (TATOLI)—Mission Aviation Fellowship (MAF) iha Timor-Leste iha marsu tinan 2023 ne’e, sei halo lansamentu ba Voo doméstiku regular foun iha Timor-Leste (TL).
“MAF sei halo lansamentu servisu Voo Doméstiku Regular foun iha fulan oin. Objetivu hosi lansamentu ba Voo foun ne’e atu konekta hotu komunidade iha área remota sira,” Diretór Nasional MAF, Nick Hitchins, hateten, liuhosi nota komunidade ne’ebé Agência Tatoli asesu, kinta ne’e.
Nia dehan, oráriu voo regular ida ne’e sei transporta pasajeiru sira no tula mós sasan iha sidade iha munisípiu hitu ba mai kapital Dili, objetivu atu fó tulun ba timor-oan sira atu bele hetan asesu di’ak liu ba iha setór saúde, edukasaun, komérsiu nomós bele vizita família sira.
Munisípiu hitu ne’ebé sei asesu ba Voo doméstiku regular foun mak hanesan, Dili, Baucau, Manufahi Same, Ataúro, Covalima Suai, Bobonaro Maliana, Lautém Lospalos.
Diretor MAF Nick Hitchins dehan, sira-nia parte lansa voo doméstika regular ne’e MAF la’os kompañia komersial aero nian, maibé organizasaun ida ne’e fiar katak importansia oferese oportunidade ekonómika ba komunidade ne’ebé normalmente difikulta tebes atu asesu ba transporte aero nian.
“Anteriormente, maneira ida ne’ebé atu halo viajen ho MAF mak aluga aviaun, maibé agora bele halo ona viajen ho presu kada kadeira no kustu ida ne’e subsídiu hosi apoiante MAF nian,” nia dehan.
Servisu voo regular ida ne’e ajuda halo viajen haleu Timor-Leste sem halo viajen tempu naruk ho transporte terrestre.
Importánsia hosi Voo regular ida ne’e fó apoiu mós ba parte saúde hodi transporta medikamentu ba komunidade, transporta aifuan no modo tahan ne’ebé lori hosi toos ho kondisaun fresku.
“MAF ajuda ona mellora ekonómia Timor-Leste nian liuhosi halo operasaun voo regular entre Dili ba Illa Ataúro. Servisu ida ne’e lori retornu liuhosi emprezáriu sira ne’ebe sai nu’udar vizitór hodi gasta sira nia osan ba alojamentu, restaurante, transporte lokál no luku iha tasi Ataúro,” nia heteten.
Nune’e, oráriu ba voo domestika regular nian halo viajen mak hanesan, loron segunda Voo regular Ataúro sei semo Dili ba Ataúro. Voo regular Maliana sei semo Dili ba Maliana. Tersa Voo regular kosta súl tasi-mane sei semo Dili, Baucau, Viqueque, Same, Suai no Voo regular ponta leste sei semo Dili, Baucau no Lautem.
Oráriu ba kuarta nian, Voo regular Ataúro sei semo Dili ba Atauro. Kinta Voo regular hosi kosta súl tasi-mane sei semo Dili, Baucau, Viqueque, Same, Suai no Voo regular ponta leste sei semo hosi Dili ba Baucau no Lospalos.
Loron sesta-feira nian, Voo regular Ataúro sei semo hosi Dili ba Ataúro. Voo regular Maliana sei semo hosi Dili ba Maliana, no sabadu nian Voo regular Ataúro sei semo iha Dili ba Ataúro.
Voo regular ida ne’e sei hahú iha loron 20 fulan marsu ne’e, relasiona ho aprovasaun hosi Governu, maibé billete sei faan iha loron 01 fulan marsu. Billete ne’e rasik sei faan liuhosi ajénsia lokál Mosan ne’ebé lokaliza iha kada sidade, no bele mós sosa direitamente hosi MAF liuhosi aplikasaun Whatsapp.
Jornalista : Arminda Fonseca
Editora : Armandina Moniz
