Komisaun A aprova relatóriu paresér alterasaun lei Eleitorál ba PN
DILI, 02 fevereiru 2023 (TATOLI)—Komisaun A trata asuntu Justisa no Konstituisionál, kinta ne’e, aprova ona relatóriu paresér ba proposta alterasaun lei Eleitorál ba Parlamentu Nasionál (PN).
Notísia Relevenate: Governu ho komisaun A hahú diskute alterasaun lei Eleitorál ba PN
“Ohin, ami halo aprovasaun relatóriu paresér proposta alterasaun lei Eleitorál Eleisaun Parlamentár no orsida lorokraik haruka ba meza Prezidente Parlamentu Nasionál hodi ajenda diskusaun faze jeneralidade iha segunda (06/01) mai,” Prezidente Komisaun A, Joaquim dos Santos, hateten ba jornalista sira iha PN, kinta ne’e.
Relatóriu paresér ba proposta-lei ne’e komisaun hala’o apresiasaun inisiál prenxe rekezitu legál hodi bele plenária diskute no aprova iha faze jeneralidade.
Nia esplika, alterasaun ne’e substánsia liu-liu sidadaun sira iha estranjeiru atu partisipa iha eleisaun ne’e ho di’ak, krisaun kondisaun ba ema ho defisiénsia matan atu introdús braille tanba dadus iha kada munisípiu rejista ema ho defisiénsia matan 300-resin, inklui tipu defisiénsia sira seluk oinsá bele apoiu asisténsia.
“Ida-ne’e mak ita sujere ba Parlamentu atu aprova hodi Governu bele implementa,” nia hateten.
Aleinde ne’e, diskute mós atu aumenta sentru votasaun no estasaun votu no fiskál sira tanba populasaun númeru aumenta.
Aleinde ne’e rezultadu audiénsia rejista, Deputadu sira hato’o iha audiénsia diskute mós barreira ba partidu polítiku sira atu hetan asentu Parlamentár mantein ka nafatin, maibé ne’e sei diskute espesífiku iha espesialidade.
Proposta alterasaun ne’e iha artigu alterasaun 10-resin no aditamentu iha artigu ualu no lei ne’e PN konsidera urjente.
Entertantu, alterasaun lei Eleitorál ba PN, komisaun A hala’o ona audiénsia hodi rona hanoin hosi Ministru Administrasaun Estatál (MAE), Sekretáriadu Tékniku Administrasaun Eleitorál (STAE), Komisaun Nasionál Eleisaun (CNE, siglá portugés), bankada Parlamentár, organizasaun ema ho defisiénsia.
Jornalista : Nelson de Sousa
Editór : Cancio Ximenes
