DILI, 02 fevereiru 2023 (TATOLI)—Prezidente Repúblika (PR), José Ramos Horta, kinta ne’e, hala’o konsulta hodi rona Partidu Demokrátiku (PD) molok dekreta loron eleisaun parlamentár 2023.
Notísia Relevante: Xefe Estadu sei enkontru ho partidu polítiku molok dekreta data eleisaun
Sekretáriu Jerál Partidu Demokrátiku (PD), António Da Conceição “Kalohan”, hateten PD hein desizaun hosi Prezidente Repúblika dekreta kalendáriou eleisaun parlamentár 2023 mak PD prreparadu no prontu partisipa iha eleisaun refere.
“Reuniaun ida-ne’e Prezidente Repúblika nia konvite, ohin oportunidade ba Partidu Demokrátiku mai fahe hanoin ba Prezidente Repúblika kona-ba preparasaun eleisaun ne’ebé mak atu mai. PD mai ho nia estrutura fó hanoin de’it tetu ba situasaun sira-ne’ebé mak ita agora daudaun lao hela, Depois mós kaer ba regra normál hatuur iha konstituisaun ida-ne’e mak ami fahe malu, hanesan ami nia hanoin ba PR, ami hein desizaun PR nian nafatin maibé tenke kaer metin konstituisaun,” Sekretáriu Jerál Partidu Demokrátiku (PD) ne’e hateten ba jornalista sira hafoin ramata enkontru ho Prezidente Repúblika, José Ramos Horta, iha Palásiu Prezidensiál Nicolau Lobato, Bairru Pite.
Nia hatutan, tanba Governu ne’e tinan lima-lima nia laran bainhira loos mak eleisaun ne’e atu mosu ne’e Xefe Estadu mak sei deside.
“Ami mós mai hanesan partidu ne’ebé moris tinan 22 ona, ami mai nafatin fó garantia ba Prezidente dehan katak ami prontu hela nafatin atu hasoru eleisaun 2023,” nia hateten.
PD nia preparasaun ho estrutura partidu hamutuk 88 ne’e, PD estabelese kada aldeia iha territóriu ne’ebé mak la’o no PD mós iha ona baze dadus atualiza rejistu to’o daudaun ne’e iha ona rihun 29-resin ne’ebé tama iha hola parte estrutura partidu nian.
“Maibé ida ne’e mak rejistu ne’ebé iha ami konsege atualiza, ami lao nafatin iha baze iha aldeia sira hotu, no ami nia espetativa mak prepradu ba iha eleisaun ho nafatin pozisaun ne’ebé PD nian iha maubere oan prontu servi no iha espetativa kadeira PD nian sei aumenta,” nia dehan.
Nia mós informa, PD prepara ona nia kondisaun ne’ebé halo tiha ona nia konferénsia nasionál, nune’e prosesu rekezitu ne’ebé lei ezije kumpre.
Jornalista : Nelson de Sousa
Editór : Cancio Ximenes
