PR Horta konvida-rona KHUNTO nia hanoin molok dekreta kalendáriu eleisaun
DILI, 02 fevereiru 2023 (TATOLI)—Prezidente Repúblika (PR), José Ramos Horta, kinta ne’e, konvida no rona partidu Kmanek Haburas Unidade Nasionál Timoroan (KHUNTO) nia hanoin molok dekreta kalendáriu eleisaun parlamentár 2023.
Notísia Relevante: PR sei dekreta kalendáriu eleisaun hafoin rona partidu polítiku sira
“Ohin, hetan konvite hosi Prezidente Repúblika hakarak partidu polítiku sira hotu, ne’ebé Prezidente ohin husu opiniaun hosi partidu ida-idak kona-ba eleisaun parlamentár iha tinan 2023 agora. Entaun ita hotu hato’o hanoin ba Prezidente maibé ha’u hanoin Prezidente sei hanoin di’akliu hotu, ita rona bainhira mak PR atu fó sai,” Konsilleiru Másimu Partidu KHUNTO, José dos Santos Naimori Bukar, hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite, kinta ne’e.
Tanba, nia dehan, Xefe Estadu mak iha devér tomak atu bainhira mak dekreta kalendáriu eleisaun parlamentár.
“Ne’ebé ita hotu hein, ne’e mak Prezidente hakarak rona polítiku sira-nia hanoin toinsá ita bele la’o ho situasaun ne’ebé di’ak, iha eleisaun mai,” nia hateten.
Ligadu ho KHUNTO nia preparasaun ba eleisaun parlamentár ne’e, nia hateten KHUNTO prontu atu apartisipa bainhira de’it PR dekreta ona kalendáriu eleisaun.
Naimori hateten, rezultadu eleisaun mai ne’e fí fila ba povu mak deside no eleisaun agora kona-ba koligasaun ho partidu seluk, ida-ne’e KHUNTO prefere ida-idak la’o ninian hafoin eleisaun hotu mak bele ko’alia.
Entertantu, antes ne’e Prezidente Repúblika hala’o ona konsulta ho Governu, Partidu asentu Parlamentár hanesan União Demokrátika Timorense (UDT), Partidu Unidade Dezenvolvimentu Demokrátiku (PUDD), Frente Mundansa.
Notísia Relevante: Previzaun data Eleisaun Parlamentár sei hala’o iha 06 ka 12 maiu
Jornalista : Nelson de Sousa
Editór : Cancio Ximenes
