BAUCAU, 02 fevereiru 2022 (TATOLI) – Projetu irrigasaun Galata ne’ebé lokaliza iha postu administrativu Venilale, munisípiu Baucau, sei gasta millaun $14.
Nune’e oras ne’e kompañia responsável konstrusuan irrigasaun Galata, postu administrativu Venilale, hahú identifika fatin (bassecamp) no prepara kondisaun antes hahú konstrusaun iha tinan-ne’e.
Diretór servisu munisipál agrikultura Baucau, Moises Lobato Perreira, esplika, projetu refere kategoria tipu multianuál ne’ebé liuhosi konkursu públiku internasionál no kompañia hosi nasaun Xineza mak sai manán-na’in ba obra refere.
“Agora daudaun sira komesa instalasaun ba fatin hodi hela, sei kontinua mobiliza ekipamentu pezadu mak foin hahú konstrusaun,” Diretór servisu munisipál agrikultura Baucau hateten iha Vila Nova, kinta ne’e.
“Ita konsidera hanesan mega projetu iha Baucau,” Moises Perreira akresenta.
Orsamentu ba konstrusaun irrigasaun Galata prevee liuhosi fundu infraestrutura ho montante millaun $14 ho tipu multianuál ne’ebé irrigasaun refere sei kobre natar iha postu administrativu tolu hanesan Venilale, suku Lelalai, postu administrativu Quelicai no Uaibobo iha postu administrativu Ossu, munisípiu Viqueque.
Tuir planu sei iha odamatan bee rua ne’ebé parte leste fornese ba postu Ossu, munisípiu Viqueque no parte Oeste sei fornese ba postu Venilale komposta hosi suku Uatuhaco, Uailaha, Baduho’o no Bahamori, postu administrativu Venilale purvolta natar ektare rihun ida-resin.
Irrigasaun iha Baucau kategoria rua hanesan maibé tékniku komposta hosi irrigasaun Bolutu, postu administrativu Vemasse no Bailaha iha suku Larisula, postu administrativu Baguia. Enkuantu kategoria semí tékniku komposta hosi irrigasaun Seiçal, Venilale no Laga.
Antes ne’e, Diretora Jerál Ministériu Agrikultura no Peska, Maria Odete do Céu Guterres, fó-sai katak, irrigasaun ne’e sei gasta millaun $14.
Notísia relevante: Governu sei konstrui irrigasaun Galata iha Venilale
Jornalista : Natalino Belo
Editór : Evaristo Soares Martins
