Alemaña apoiu Timor-Leste adere ba ASEAN
DILI, 03 fevereiru 2023 (TATOLI)—Prezidente Repúblika (PR), José Ramos Horta, sesta ne’e, halo audiénsia ho Embaixadora Alemaña ne’ebé rezidente iha Jakarta (Indonézia), Ina Lepel, hodi diskute relasaun bilaterál entre nasaun rua liu-liu apoiu Timor-Leste adere ba ASEAN.
“Ha’u-nia enkontru ho Prezidente kapaas tebes. Ami diskute buat barak kona-ba relasaun bilaterál entre nasuan rua no ami mós diskute kona-ba prosesu dezenvolvimentu Timor-Leste nian, espesialmente Timor-Leste ninia aplikasaun atu adere sai Membru ASEAN, ne’ebé mak Alemaña apoiu makaas tebes,” Embaxadora Ina Lepel hateten ba jornalista sira hafoin ramata enkontru ho Xefe Estadu, José Ramos Horta, iha Palásiu Prezidensiál Nicolau Lobato, Bairru Pite.
Nia parte simu informasaun barak ne’ebé mak interresante tebes kona-ba Timor-Leste ninia aplikasaun hodi sai membru ASEAN.
“No ha’u-nia dezeju boot ba susesu Timor-Leste ninia esforsu tomak atu sai membru ASEAN,” nia hateten.
Embaixadora ne’e hateten, buat ne’ebé importante ba Timor-Leste bainhira partisipa iha ASEAN mak iha edukasaun no kapasidade, nune’e mós konektividade liu-liu hanesan internet.
“Ida-ne’e entre Timor-Leste no ASEAN ami sei fó apoiu makaas ba Timor-Leste ninia esforsu tomak atu sai membru ASEAN. Agora daudaun ne’e ami hakarak apoiu Timor-Leste iha área edukasaun no hasa’e kapasidade,” nia dehan.
Jornalista : Nelson de Sousa
Editór : Cancio Ximenes
