MEJD la orienta eskola DMCL Maliana rekruta profesór parsiál 20
BOBONARO, 03 fevereiru 2023 (TATOLI)- Ministériu Edukasaun, Juventude no Desportu (MEJD) liuhosi Servisu Edukasaun Munisípiu Bobonaro, la orienta eskola sekundária jerál númeru 1 Dom Martino da Costa Lopes Maliana (DMCL), rekruta profesór parsiál 20.
Diretór Servisu Edukasaun Munisipál Bobonaro, Crispim Lopes Moniz, laiha koñesimentu kona-bá prosesu rekrutamentu ida-ne’e.
Notísia relevante: MEJD esforsu rezolve problema profesór kontratadu 4.902
“Ha’u hakarak fó hatene de’it katak laiha orientasaun hosi edukasaun kona-ba rekrutamentu ida-ne’e,” nia informa ba Jornalista sira hafoin partisipa misa abertura tinan letivu foun 2023 ba eskola Dom Martinho da Costa Lopes Maliana, sesta ne’e.
Crispim subliña, maske la hatún despaxu ruma, maibé parte edukasaun munisipál nafatin akompaña prosesu sira durante ne’e.
“Ami hetan ona informasaun kona-bá situasaun, ne’e sira-nia problema ne’e falta profesór. Ligadu ba ida-ne’e servisu edukasaun munisipál halo ona ezersisiu balun hodi bele haree profesór sira-ne’ebé iha eskola sira seluk,” nia katak.
Nia fó ezemplu, ezemplu alunu oituan no profesór mak barak liu, entaun dada mai kompleta fali iha Dom Martinho da Costa Lopes Maliana, maibé eskola ida-ne’e kontinua enfrenta nafatin menus profesór.
Tanba iha alunu 3000-resin, enkuantu númeru profesór destaka iha ne’e la kondiz ho númeru alunu.
Haafoin rona rekrutamentu liuhosi kontribuisaun osan hosi inan-aman, parte edukasaun munisipál bolu kedas dirijente eskola Don Martinho da Costa Lopes atu neutraliza situasaun ne’e.
Maibe diretór ne’e konfirma bazea ba sirkulár ne’ebé mak iha, katak la permite atu halo kontribuisaun.
“Ami bolu sira, atu hapara provizoriumente ba kontribuisaun ne’e hodi hein orientasaun hosi Ministériu Edukasaun, Juventude no Desportu, tanba ita hatene katak iha tempu badak Ministériu Edukasaun sei konkretiza kona-ba rekrutamentu profesór kontradau,” nia katak.
Diretór Eskola Dom Martinho da Costa Lopes Maliana, Abel Sarimau, esklarese parte eskola la rekruta maibé prosesu rekrutamentu ne’e kontribuisaun hosi inan-aman sira.
“Ha’u dehan hanesan ne’e tanba inan-aman mak tau duni kontribuisaun, ami la kaer osan, entaun inan-aman mak fó sai vaga ne’e ba públiku presiza mestre ida-ne’e, mestri ida-ne’e, iha área espesialidade ida-ne’e, entaun inan-aman mak rekruta duni, eskola la rekruta ida, hahú hosi anunsiu vaga, verifikasaun dokumentu ba to’o entrevista ne’e papél Konsellu dos Pais ne’ebé maka delegasaun masimu hosi alunu rihun tolu resin,” Abel esplika.
Nia esplika, nesesidade eskola nian aprezenta mestre la to’o, tanba profesór permanente ne’e iha 54 de’it, sura ho guarda na’in-rua ho administrasaun na’in-ida hamutuk funsionariu 57
Entaun haree ba balansu alunu 3000-resin ho mestre 54 de’it, ne’e hatudu katak susar tebes.
“Ami aprezenta ba inan-aman foun lalais ne’e mak $45 ne’e tinan ida nian, ami fahe ba períodu tolu, sé $45 ne’e dívida ba periodu tolu, entaun hetan $15 kada alunu selu períodu ida,” nia dehan.
Totál estudante tinan letivu 2023 ne’ebé mak daudaun ne’e atu tuir prosesu aprendizajen iha eskola refere hamutuk 3000-resin.
Notísia relevante: Eskola DMCL Maliana simu de’it estudante na’in-450
Jornalista: Sérgio da Cruz
Editór: Evaristo Soares Martins
