Saudozu Sebastião Gomes nia-aman baixa tan iha ospitál Viqueque
VIQUEQUE, 03 fevereiru 2023 (TATOLI)—Saudozu Sebastião Gomes, nia-aman, Afonso Gomes ho idade 75, baixa tan iha Ospitál Internamentu Viqueque tanba sofre nafatin pulmaun no kardiovaskular.
Médiku Ospitál Internamentu munisípiu Viqueque, Hermenegildo Ferreira, informa família lori Saudozu nia-aman mai iha ospitál internamentu iha loron kinta (2/02), tuku 06:00, dadeer tanba dada iis araska.
Nia dehan, Saudozu nia-aman ne’e sofre nafatin pulmaun no kardiovaskular, ne’ebé antes ne’e hetan ona tratamentu médiku, maibé la kuidadu-an, nune’e hahú moras fali.
” Ami observa ona katak saudozu nia-aman presiza duni ba hetan tratamentu intensivu iha Hospitál Nasionál Guidu Valadares (HNGV). Nune’e médiku sira deside halo karta transferensia ba HNGV, maibé klima la di’ak ne’ebé aviaun seidauk mai tula. Tanba ne’e pasiente sei kontinua baixa iha sala internamentu Viqueque. Bainhira klíma di’ak fali aviaun foin mai tula ba HNGV,” Médiku ne’e hateten ba Agência TATOLI iha kna’ar fatin, Viqueque-vila, sesta ne’e.
Médiku ne’e afirma, maski saudozu nia-aman ne’e baixa hela, maibé kondisaun jerál di’ak tanba daudaun médiku sira fó ona tratametu médiku.
Iha fatin seluk, Segundu Vise Komité 12 Novembru Rejiaun Ponte-Leste, Emídio Amarál, informa komité kontinua akompaña saudozu Sebastião Gomes nia-aman, Afonso Gomes tanba hanesan mós veteranu ordén Nicolao Lobato.
“Ami akompaña hela saudozu nian-aman iha internamentu no médiku sira halo ona karta trasferensia atu lori ba Dili”, nia afirma.
Nia afirma, Saudozo Sebestião Gomes nia-aman hanesan patrimóniu Estadu tanba oferese ninia-án no oan ba mate iha 28 outubru 199, ho nia-mate mak hamosu manifestasaun boot no akontese Masakre Santa Cruz iha 12 novembru 1991.
“Nune’e, ha’u husu ba Governu atu buka Ospitál di’ak ruma iha rai li’ur hodi saudozu nian-aman bele hetan tratamentu di’ak. Se ita kontinua tratamentu iha ita-nia rain, ha’u hanoin moras nafatin tanba tinan kotuk baixa ona, maibé agora moras fila-fali”, nia sujere.
Daudaun, saudozu nian-aman ho idade 75, hanesan aman hosi saudozu Sebastião Gomes, dadaun ne’e saudozu Sebestian Gomes ninia aman hetan akompaña husi família, Konsellu Veteranu munisípiu Viqueque no sobre vibente 12 novembru iha Ospitál Internamentu Viqueque.
Notísia relevante:Saudozu Sebastião Gomes nia-aman baixa iha HNGV
Jornalista : Vitorino Lopes da Costa
Editór : Florencio Miranda Ximenes
