DILI, 06 fevereiru 2023 (TATOLI)—Deputadu bankada Partidu Demokrátiku (PD) iha Parlamentu Nasionál (PN), Andriano do Nacimento, propoin ba Governu iha eleisaun parlamentár mai atu loke sentru votasaun iha Indonézia.
Notísia Relevante: Eleisaun Parlamentár 2023: MNEK sujere kria sentru votasaun foun iha Indonézia-Filipina
“Ha’u iha hanoin ida mós atu loke sentru votasaun iha Indonézia, iha preokupasaun balun katak ne’e bele iha manipulasaun, ne’e problema ho Indonézia bele. Maibé ha’u hanoin se loke sentru votasaun iha Indonézia ita bele uza kriteira ho pasaporte, tanba Indonézia laiha dupla sidadania mak nia hatudu nia pasaporte vota nia Timor duni,” Deputadu Adriano hato’o liuhosi reuniaun plenária iha debate proposta alterasaun lei Eleitorál ba PN, segunda ne’e.
Nia propoin atu loke sentru votasaun iha Indonézia, tanba timoroan sira barak liu hanesan estudante hela iha Indonézia kompara ho sira-ne’ebé iha Austrália, Portugál no Korea.
“Indonézia barak liu tanba ema sira-ne’ebé inan-aman laiha kbiit finansiál sira haruka de’it ba Indonézia hodi tuir eskola iha ne’eba,” nia dehan.
Nune’e Deputadu hosi bankada opozisaun ne’e husu Governu nia hanoin óinsá atu haree.
Hatán ba ida-ne’e, Ministru Administrasaun Estatál (MAE), Miguel Ferreira de Carvalho, hateten relasiona ho eleisaun Indonézia hanesan opsaun ida maibé nia parte hanoin katak preokupasaun serake Indonézia bele admite Timor-Leste realiza eleisaun iha sira-nia rai.
“Kestaun ida-ne’e, hanesan Governu, ha’u sei ko’alia ho Ministériu Negósiu Estanjeiru (MNEK) atu bele haree asuntu ne’e, maibé hanesan impedimentu ida parese hanesan Deputadu dehan ona, no posibilidade Governu Indonézia autoriza ita hala’o eleisaun iha ne’eba,” nia hateten.
Notísia Relevante: Governu preparadu realiza eleisaun parlamentár
Jornalista : Nelson de Sousa
Editór : Cancio Ximenes
