COVALIMA, 06 fevereiru 2023 (TATOLI)–Governu liuhosi Ministériu Solidariedade Sosiál no Inkluzasaun (MSSI), sei kontinua halo pagamentu ba reklamante subsídiu fim do ano $200 iha Covalima iha tempu badak.
Notísaia Relevante: KM aprova lista reklamante subsídiu $200 liu 8.800 atu hetan direitu
“Kona-ba subsídiu fim do ano $200 ba reklamente sira ne’ebé Konsellu Ministru aprova ona iha semana kotuk, atu alarga períodu pagamentu iha tempu badak. Iha semana ida ka rua nia-laran, sira halo servisu no reklamante sira-bele hetan ona sira-nia direitu,” Vise Ministra Sosidariedade Sosial no Inkluzaun (MSSI), Signi Chandrawati Verdial, hateten ba jornalista-sira hafoin enkontru ho autoridade Covalima iha salaun AMC, Sukaer Laran, segunda ne’e.
Bazea ba lista reklamante subsídiu fim do ano $200 iha munisípiu Covalima ne’e menus hosi uma kain 200 no iha munisípiu Dili mak barak liu to’o 1,200-resin.
Antes ne’e, iha kinta (9/01/23) liubá ne’e, Koordenadór Pagamentu Subsidiu fim do ano $200, dadus benefisiáriu iha munisípiu Covalima hamutuk 20,243 ho alokasaun orsamentu hamutuk $4,048 ,600.00, ba uma kain ne’ebé selu ona hamutuk 19064 ho orsamentu $3,812,800.00 no uma kain ne’ebé seidauk selu ne’e hamutuk 1,179, nune’e saldo ne’e hela $235,800.00
Entretantu, iha kuarta (01/02/2023) ne’e Konsellu Ministru (KM) aprova alterasaun daruak ba dekretu-lei númeru 37/2022 kona-ba subsídiu fim do ano ba uma kain sira hodi alarga períodu pagamentu to’o abríl tinan 2023.
Jornalista : Celestina Teles
Editór : Cancio Ximenes
