DILI, 01 fevereiru 2023 (TATOLI)—Vise Ministra Solidariedade Sosiál no Inkkuzaun (MSSI), Signi Chandrawati Verdial hateten, kuarta ne’e, iha reuniaun Konsellu Ministru (KM) aprova lista reklamante subsídiu $200 hamutuk 8,800-resin iha territóriu nasionál atu hetan sira-nia direitu.
Notísia Relevante: MSSI husu PM rezolve lista reklamante subsídiu $200
“Reklamansaun ohin aprezenta no aprovadu ona ba reklamante 8.812-resin ne’e, Konsellu Ministru foin aprova. Imi fó tempu, nune’e téniku sira halo nia servisu uitoan, ne’ebé semana ida-rua ita hanoin realiza pagamentu,” Signi Chandrawati Verdial hateten ba Agência Tatoli, kuarta ne’e.
Governante ne’e hateten, iha kuarta (01 fevereiru) ne’e, Konsellu MInistru aprova atu muda ba segundu alterasaun ho lei inisial númeru 37/2022.
Antes ne’e, MAE relata dadus reklamante sira iha territóriu nasionál hamutuk 28.000-resin maibé ne’e inklui ona ho funsionáriu ne’ebé mak ho nia saláriu $500 ba leten, entaun ho ida-ne’e mak dadus hodi menus tiha.
Hosi reklamante sira-ne’e, nia dehan, maiória hosi munisípiu Dili kuaze 1000-resin no munisípi seluk balun to’o de’it 100 no 200.
“Ida-ne’e akontese tanba dadus barak demais no nu’udar umanu sempre iha erru no fallansu liu-liu liga ho dadus ne’ebé barak liu, hanesan foin lalais akontese iha aldeia balun ne’ebé kuaze dadus lakon tiha, tanba fallansu tékniku maibé ita tenta jere. Maibé, prontu la konsege entaun mosu lista reklamante sira,” nia hateten.
Notísia Relevante: Governu sei altera dekretu-lei subsídiu $200 atu selu reklamante sira
Jornalista : Osoria Marques
Editór : Cancio Ximenes
