DILI, 10 janeiru 2023 (TATOLI)—Vise Primeiru-Ministru no Ministra Solidariedade Sosiál no Inkkuzaun (MSSI), Armanda Berta dos Santos, husu Primeiru Ministru Taur Matan Ruak atu hamutuk hodi rezolve lista reklamante ba programa subsídiu fim do ano $200 ba uma kain.
Notísia Relevante: Xefe família 28.583 iha territóriu nasionál la simu subsídiu $200
“Tuir dekretu-lei katak laiha reklamante maibé bainhira finaliza tiha pagamentu subsídiu fim do ano iha 06 janeiru, mosu reklamante iha territóriu nasionál hamutuk 28.000-resin. Entaun, ohin ko’alia ona ho Primeiru-Ministru katak oinsá atu haree ida-ne’e no rezolve sira-ne’ebé tama lista reklamasaun nian. Tanba iha lei hatuur ona katak la ko’alia kona-ba reklamante,” Governante ne’e hateten ba jornalista sira hafoin sorumutuk ho PM, iha Palásiu Governu, tersa ne’e.
Loron ohin ne’e ko’alia ona ho Primeiru-Ministru Taur Natab Ruak atu rezolve, karik sei iha dalan atu selu ne’e di’ak maibé, se laiha pasiensia. Tanba dekretu lei ba programa subsídiu fim do ano, se la selu ona ne’e pasiénsia simu realidade tanba iha lei la temi iha reklamenye.
“Ida-ne’e mak ohin ha’u mai relata servisu durante ne’e ba Primeiru Ministru, Taur Matan Ruak, no ohin informa mós programa subsídiu $200 ne’ebé ita termina loron 06 janeiru liubá ba PM,” nia dehan.
Vise Ministru Administrasaun Estatál (MAE), Lino Torrezão de Jesus, hateten lista reklamante ba subsídiu fim do ano ne’e hein desizaun Konsellu Ministru.
“Kona-ba ida-ne’e sei hetan rezultadu hosi Konsellu Ministru,” Vise Lino dehan.
Totál benefisiáriu iha territóriu nasionál hamutuk 339.954 ho montante alokadu $67.990.800.
lha dekretu-lei 37/2022, artigu 2 ne’e hateten katak família ne’ebé sai benefisiária ne’e ninia membru ida mak nia rendimentu mensal $500 no liu $500 ne’e labele simu subsídiu $ 200.
Jornalista : Osoria Marques
Editór : Cancio Ximenes
