DILI, 06 fevereiru 2023 (TATOLI) – Primeiru-Ministru (PM), Taur Matan Ruak, realiza, segunda ne’e, vizita ofisiál Estadu dahuluk bá Austrália ho objetivu atu hametin liután kooperasaun bilaterál.
“Objetivu husi vizita ne’e mós atu agradese ba Governu no povu australianu ba sira-nian apoiu no jenerozidade ba EzekutivuTimor-Leste durante mandatu VIII Governu Konstitusionál nian, liuliu iha situasaun covid-19 hodi apoia vasina no espesialista sira mai Timor-Leste, inklui mós ajuda iha kalamidade ne’ebé akontese iha tinan 2020 no 2021”, relata nota hosi gabinete Xefe Governu.
Durante estadia iha Austrália, Xefe Governu timoroan sei hasoru malu ho nia omólogu australianu, Anthony Albanese, halo mós enkontru kortezia ho Governadór Jerál, David Hurley, no ho personalidade importante sira seluk país ne’ebá nian.
Vizita Primeiru-Ministru nian ne’e loloos hala’o iha fevereiru 2022, maibé tanba nia pozitivu tiha covid-19, nune’e adia tiha no foin bele realiza fali.
Iha vizita ne’e, Xefe Governu sei hetan akompañamentu hosi Ministra Negósiu Estranjeiru no Kooperasaun, Adaljiza Magno.
Vizita bá nasaun viziña ne’e, entre loron 06 to’o 09 fevereiru, no Xefe Governu ho delegasaun sei to’o fali mai Timor-Leste iha loron 10 fulan refere.
Notísia relevante: Taur sei vizita Austrália no Indonézia iha fevereiru
Jornalista: Antónia Gusmão
Editora: Maria Auxiliadora
