COVALIMA, 06 fevereiru 2023 (TATOLI)–Diretór Programa Nasionál Dezebvolvimentu Suku (PNDS) Covalima, Filipe Cardoso, hateten Programa Nasionál Dezenvolvimentu Suku (PNDS) seidauk konstrui Uma Nasionál ba Povu (UNP) tinan fiskál 2021 unidade tolu iha aldeia Horba, suku Lepo, postu administrativu Zumalai, munisípiu Covalima.
Notísia Relevante: Konstrusaun UKL unidade 90 iha Covalima atinje ona 90,31%
“Progresu implementasaun Uma Naroman ba Povu (UNP) faze dahuluk tinan fiskál 2021 ne’ebé konstrui unidade 90 hosi númeru ne’e nia progresu atinje foin 90%, seidauk bele atinje 100%, tanba UNP unidade tolu seidauk implementa,” Filipe Cardoso hateten dadus ne’e ba Agência Tatoli, iha-nia servisu fatin, Sukaer Laran, segunda ne’e.
Razaun UNP unidade tolu iha suku lepo aldeia horba, postu administrativu Zumalai seidauk bele implementa seidauk bele atinje 100% tanba laiha estrada atu distribui materiál konstrusaun.
“Maske Suku Lepo la asesu ba estrada ami halo ona ezersiu lubuk ida oinsá bele implementa mobiliza komunidade hodi loke estrada, maibé foin lalais udan estraga hikas estrada ne’ebé komunidade ho volontáriu hodi ateru estrada refere,” nia hateten.
Ho nune’e, PNDS mós identifika ona suku no aldeia sira-ne’ebé la asesu hodi submete lista ba iha nasionál nune’e prepra submete ba Institutu Jestaun Ekipamentu, Institutu Públiku (IGE, I.P, sigla portugés) bele normaliza estrada.
Bazea ba dadus PNDS identifika suku sira-ne’ebé mak la asesu estrada mak hanesan suku Lepo, postu administrativu Zumalai faze dahuluk no suku Nanu no Belulik Leten, iha postu administrativu Fatumea implementa UNP faze daruak la asesu estrada.
Ekipa Programa Nasionál Dezenvolvimentu Suku (PNDS) ba UNP unidade 90 ne’ebé implementa iha postu administrativu hitu suku 30 ho nia orsamentu hamutuk $1,491.000.00
Jornalista : Celestina Teles
Editór : Cancio Ximenes
