COVALIMA, 06 fevreiru 2023 (TATOLI)–Diretór Sekretáriu Tékniku Administrasaun Eleitorál (STAE) Covalima, Francisco Gusmão, hateten STAE Covalima akompaña hosi rekursu umanu STAE Nasionál, finaliza ona halo selesaun dokumentu ba kandidatu brigada na’in-410.
Notísia Relevante: CNE fó formasaun ba komisáriu 52 haforsa kapasidade servisu iha Elpar
“Kona-ba rezultadu hafoin rekolla dokumentu sira-ne’e, foin lalais loron 03 fulan-fevereiru 2023, ami halo ona selesaun dokomentu ne’ebé rezulta lori hotu ona ba nasionál hein-de’it fó sai-nia rezultadu. Maibé tanba iha fatin seluk seidauk finaliza entaun hein atu públika rezultadu dala ida,” Diretór STAE Covalima ne’e hateten ba Agência Tatoli, iha Kampung Baru, segunda ne’e.
Prosesu rekrutamentu sidadaun sira hahú submete sira-nia dokumentu iha loron 20 fulan-janeiru ne’ebé taka iha 27 fulan-janeiru 2023, ne’ebé sidadaun na’in-410 submete sira-nia dokumentu ba STAE Covalima.
Hafoin ne’e, STAE Covalima akompaña hosi rekursu umanu STAE nasionál hala’o selesaun dokumentu hahú iha loron 03 fevreiru tinan 2023, ho nune’e de’it atu fó sai rezultadu rekrutamentu kandidatu brigada sira prepara ba eleisaun parlamentár.
Dadus sidadaun ne’ebé submete sira-nia dokumentu ba STAE hamutuk na’in-410 no hosi númeru ne’e, na’in-383 aplika vaga ba kandidatu brigada no aplika vaga ba pontu fokál na’in-97.
Bazea ba vaga ne’ebé STAE fó sai presiza na’in-107 no hosi númeru ne’e pontu fokál na’in-hitu (7) no brigada na’in-100 hodi prepara ba eleisaun parlamentár.
STAE rekruta brigada na’in-100 ne’e atu destaka iha sentru votasaun no estasaun votasaun ne’ebé estabelese ona iha munisípiu Covalima.
Antes ne’e, STAE estabelese sentru votasaun 80 no estasaun votasaun 92 iha Covalima, maibé preparasaun ba eleisaun parlamentár, STAE aumenta sentru votasaun 20 ho nune’e total sentru votasaun hamutuk 100 ho estasaun votasaun 92 no aumenta ualu (8).
Jornalista : Celestina Teles
Editór : Cancio Ximenes
