DILI, 06 fevereiru 2023 (TATOLI)—Prezidente Komisaun Nasionál Eleisaun (CNE, sigla portugés), Jose Agostinho da Costa Belo, hateten CNE fó formasaun ba komisáriu nasionál no munisipál na’in-52 atu haforsa sira-nia kapasidade iha períodu Eleisaun Parlamentár (Elpar) 2023.
Notísia Relevante: CNE sei rekruta ofisiál 120 prepara ba eleisaun parlamentár
“Komisáriu Nasionál sira hotu tenke hala’o servisu di’ak iha eleisaun parlamentár no hadi’a servisu hodi garante susesu eleisaun parlamentár nian. Tanba ne’e, iha workshop nasionál ba komisáriu nasionál no munisipál na’in-52 ho objetivu atu haforsa sira-nia kapasidade servisu iha períodu eleisaun parlamentár tinan 2023 nian,” Prezidente CNE, Jose Agostinho da Costa Belo, ne’e hateten ba jornalista sira iha salaun apuramentu CNE, Colmera, segunda ne’e.
Tuir nia, semináriu ne’e ho objetivu modulu ba edukasaun sívika durante loron lima nia laran. Hodi define estratéjia eklaresimentu ba meiu komunikasaun sosiál, kria grupu fasilitadór permente no idenfika parseiru xave sira hodi bele koopera bai ha eleisaun parlamentár.
“Ami revee pontu balun ne’ebé la implementa di’ak no presiza hadi’a liután, importante mak komisáriu no diretór sira no ema hotu tenke iha ideia ida atu fornese servisu ba votante sira,” nia hateten.
Prezidente CNE hatutan, sosiedade nia konfiansa ba órgaun eleitorál importante tebes, nune’e komisáriu sira tenke kompromete ba vizaun ida, ideia ida-ne’ebé reflete ba Konstituisaun Timor-Leste nian.
Workshop ne’ebé finansia hosi Komisaun Nasionál Eleisaun (CNE) ho valór montante hamutuk $9,000.
Diretór CNE munisípiu Viqueque, Honorio da Silva, hateten hafoin formasaun ohin ne’e parte relevante sei deside hodi fó edukasaun sívika ba sidadaun sira iha territóriu nasionál.
“Objetivu hosi atividade edukasaun sívika ne’e rasik, oinsá ita konvense ita-nia eleitór sira, nune’e bele partisipa ativu iha prosesu eleisaun no mós apar ho prosesu eleisaun parlamentár ne’e. Aleinde ne’e sei esplika mós kona-ba alterasaun lei eleitorál ba ita-nia komunidade, nune’e ohin ita hala’o workshop depois ita sei tuur hamutuk hodi deside fó edukasaun sívika,” nia dehan.
Liga ho rekursu umanu iha munisípiu Viqueque, nia dehan, daudaun ne’e funsionáriu permanente CNE iha ne’ebá hamutuk na’in-hitu (7) maibé CNE munisípiu Viqueque halo hela rekrutamentu ba ofisiál eleitorál sira atu bele halo servisu ba susesu eleisaun parlamentár nian.
“Ita halo rekrutamentu mós bazea ba sentru no estasaun votasaun iha Viqueque, tanba ita hakarak halo supervizauna ho másimu no rigorozu, entaun ita sei tau ita-nia ema iha suku hotu-hotu, nune’e bele iha transparansia no asegura mós tratamentu ne’ebé hanesan ba sidadaun hotu-hotu,” nia hateten.
Jornalista : Osoria Marques
Editór : Cancio Ximenes
