DILI, 07 fevereiru 2023 (TATOLI)—Sentru Lojístiku Nasional (CLN, sigla portugés), daudaun ne’e, sei iha estoke foos iha armajen nasional hamutuk 350.000 toneleda.
Diretór Transporte no Lojístiku iha CLN, Tito da Costa, hateten, relasiona ho informasaun ne’ebé fó sai fulan neen mai oin populasaun 20% sei infrenta inseguransa ai-han no CLN rasik sei iha estoke ne’ebé sufisiente bainhira akontese situasaun difísil ruma.
“Kona-ba estoke foos daudaun ne’e sei sufisiente hela atu atende ba situasaun difísil ruma, tanba ita iha produtu lokál hare kulit hamutuk 2.000 tonelada no foos importasaun sei iha 150.000 tonelada ne’ebé hamutuk 350.000 tonelada,” Tito da Costa dehan ba Agência Tatoli, iha nia knaar-fatin, Armajen Nasional Bebora, Dili, tersa ne’e.
Nia dehan, CLN rasik iha ninia armajen sira mak hanesan iha nasionál makai ha Dili no Tibar,nomos iha rejional (Baucau, Natarbora, Maliana no Maubisse) .
“Hosi armajen ne’e Baucau iha hare kulit 500 resin tonelada, Maliana 460 tonelada, no restu ne’e mak iha armajen Tibar, ba Natarbora no Maubisse seidauk iha hare kulit,” nia dehan.
Armajen sira ne’ebé sei mamuk tinan ne’e CLN sei sosa tan hare kulit. Tanba tinan ne’e Governu aloka orsamentu atu sosa hare kulit ne’e, hamutuk milliaun $3. Kona-ba tonelada hira daudaun ne’e ekipa tékniku sira sei haree lai.
“Hosi orsamentu milliaun $3 ne’e, aleinde sosa hare kulit sei sosa mós item produtu lima seluk hanesan, foremungu, fore rai, batar, fore mean no koto. Maibé ba item seluk ne’e sei haree lai tanba produtu seluk ne’e hola mai ladun dura no rai kleur nia sai fuhuk lalais. Ho ida ne;e, ekipa tékniku sei haree lai,” Tito hateten.
Jornalista : Arminda Fonseca
Editora : Armandina Moniz
