DILI, 07 fevereiru 2023 (TATOLI)–Diretór Jerál Sekretariadu Tékniku Administrasaun Eleitorál (STAE), Acilino Manuel Branco, hateten implementasaun postal voting iha diaspora ne’e embaixada sira mak sei organiza no lori bulletin votu ba eleitór sira-ne’ebé okupadu nia hela fatin.
Notísia Relevante: Postal voting sei fasilita eleitór sira vota iha rai-li’ur
“Atu garante implementasun postal voting ba eleitór ida nia hela fatin ne’e. Mekanizmu implementa ne’e mak semana tolu antes tenke to’o ona iha embaixada. Agora, to’o ona iha embaixada sira, entaun sira mak sei organiza hodi haruka ba sidadaun ida-ne’ebé mak halo ona aplikasaun atu vota liuhosi postal voting no ita-nia sentru votasaun funsiona hotu,” Acilino Manuel Branco hateten ba Agência tatoli liuhosi telefónika, tersa ne’e.
Nia hateten, ida-ne’e STAE garante tanba la’ós ba sidadaun hotu-hotu iha rai-li’ur no postal voting ne’e ba de’it ema ne’ebé okupadu ho estudu no servisu balun, entaun ida-ne’e bele garante no asegura segredu votu nian.
Postal voting hanesan korreiu ka kantor pos (pos dan giro) ida, nune’e ida-ne’e fasil organiza, STAE iha perspetiva no planu medida ne’e, maibé dahuluk eleitór tenke atualiza nia unidade jeográfika ka sidade ne’ebé nia hela bá.
“Bainhira iha tempu atualizasaun mak nia (eleitór) mós tenke deside ona ho razaun katak ha’u okupadu ka hela fatin dook no ha’u hakarak aplika iha postal voting de’it. Entaun, ita aplika nia ba postal voting,” nia hateten.
Bainhira atu aplika postal voting iha momentu eleisaun mak Governu no Estadu selu ema atu lori envelope ba eleitór nia fatin no iha envelope ida nia-laran ne’e, bainhira loke sei haree kona-ba instrumentu oinsá atu vota iha postal voting no iha envelope ida eleitór tau nia kartaun eleitorál hodi haruka liuhosi koreiu ne’e.
Depois, nia dehan, iha envelope kiik-oan ida nia laran ne’e, envelope segredu ne’ebé mak buletin votu iha laran depois mak eleitór foti hodi vota,” nia dehan.
Jornalista : Osória Marques
Editór : Cancio Ximenes
