iklan

EKONOMIA, BOBONARO, HEADLINE, MUNISÍPIU

Menus kombustível difikulta PDHJ Maliana fiskaliza distribuisaun cesta bázika

Menus kombustível difikulta PDHJ Maliana fiskaliza distribuisaun cesta bázika

Diretór PDHJ Delegasaun Territórial Maliana, Domingos Pinto Tavares. Imajen Tatoli/Sérgio da Cruz.

BOBONARO, 07 fevereiru 2023 (TATOLI)-Diretór Provedoria Direitu Humanu no Justisa (PDHJ) delegasaun territoriál Maliana, Domingos Pinto Tavares, hateten daudaun ne’e enfrenta hela problema menus kombustível atu halo Fiskalizasaun ba distribuisaun cesta bázika iha baze.

Nia haktuir, iha semana kotuk distribuisaun cesta bázika iha suku Leo-Hitu, postu administrativu Balibo lidera hosi Ministériu Komérsiu no Indústria husu PDHJ atu halo fiskalizasaun maibé la konsege responde.

Notisia relevante: Populasaun millaun 1,5 sai benefisiáriu ba programa Cesta Bázika

“Agora daudaun ami iha difikuldade mak kombustível menus, ami sente hela, hanesan dook sira-ne’e ami labele la’o, kuaze iha Maliana laran de’it mós agora ami la’o, maibé sukat, ne’ebé dalaruma sira dook ne’e ami labele halo buat ida,” nia informa ba jornalista sira iha SoSo, Maliana, tersa ne’e.

Domingos Pinto haktuir, problema ne’e PDHJ Maliana enfrenta iha inísiu fulan-janeiru to’o agora.

“Ami kontinua nafatin koordena ho lojístika nasionál, liuliu departamentu diresaun administrasaun finana oinsá buka meiu rezolve kestaun ne’e, tanba kombustível laiha ita labele la’o,” nia katak.

Responsavél PDHJ Maliana akresenta, ho difikuldade ne’e  provizóriu ekipa labele tún ba fiskaliza distribuisaun cesta bázika ne’ebé dadaun ne’e hela suku Holsa, postu administrativu Maliana.

Maski nune’e, hosi fulan-janeiru to’o agora seidauk simu informasaun kona-bá irregularidade durante distribuisaun cesta bázika.

“PDHJ nia odomatan nakloke, kuandu iha irregularidade ruma ne’ebé kompañia halo, hato’o mai PDHJ liuhosi telefónika, wastshap, facebook, bainhira imi simu sasán la tuir regra, labele nonok tenke fó hatene atu nune’e ita bele halo prosesu tuir lei no regra ne’ebé iha,” nia fó hanoin.

Nia husu ba setór privadu sira-ne’ebé resposabiliza programa ne’e atu kumpre lei, regra no regulamentu sira-ne’ebé governu fó-sai ona, atu nune’e labele hetan kondenasaun hosi komunidade, autoridade kompetente no instituisaun kontrolu sira.

Notísia relevante: Governu prolonga programa distribuisaun Cesta Bázika to’o marsu 2023

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!