COVALIMA, 02 fevreiru 2023 (TATOLI)–Ministru Administrasaun Estatál (MAE), Miguel Pereira de Carvalho, relata populasaun millaun 1,5 iha Timor-Leste (TL) mak sai benefisiariu ba programa Cesta Bázika.
Notísia Relevante: Empreza distribuitór Cesta Bázika 52 hetan ona pagamentu hosi MTKI
“Kona-ba implementasau programa Cesta Bázika iha Timor-Leste, ha’u hakarak alerta ba ita-boot sira katak populasaun hamutuk millaun 1,5 mak sai benefisiáriu simu Cesta Bázika. Ha’u hanoin ita-boot sira hotu-hotu mós simu,” Miguel Pereira de Carvalho relata dadus ne’e liuhosi diskursu iha serimónia entrega zinku ba benefisiáriu Uma Naroman ba Povu Plus B (UNP+ B) iha AMC Covalima, kinta ne’e.
Bazea ba sensu populasaun iha Timor-Leste (TL) totál populasaun hamutuk millaun 1,3 maibé benefisiária ba programa Cesta bázika ne’e populasaun hamutuk millaun 1,5 mak sai benefsiáriu.
“Ita-nia sensu populasaun ne’e iha populasaun hamutuk millaun 1,3, maibé ha’u dala ruma husu ha’u-nia laran katak millaun 200 adisionál ne’e mai hosi ne’ebé, ha’u laiha resposta,” nia informa.
Notísia Relevante: PN aprova tán millaun $40 ba MTKI implementa Cesta Bázika
Kona-ba dadus sira-ne’e, nia rasik laiha resposta maibé resposta mak iha xefe suku no xefe aldeia sira mak rejista benefisiáriu subsídiu fim do ano $200 ba uma kain no mós programa Cesta Bázika.
Antes ne’e, iha loron 10 dezembru 2021 ne’e, Parlamentu Nasionál liuhosi diskusaun orsamentu jerál Estadu (OJE) tinan 2022, iha faze espesialidade aprova tan orsamentu adisionál ho montante millaun $40 ba Ministériu Komérsiu Turizmu no Indústria (MTKI) hodi implementa programa Cesta Bázika.
Implementa programa Cesta Bázika ho nia objetivu estimula rekuperasaun ekónomia no atrai produsaun rai-laran, tanba natar barak abandona nune’e gradualmente osan labele sai ba li’ur no korre dependénsia produtu hosi rai-li’ur.
Notísia Relevante: Implementasaun Cesta Bázika atinje ona 62,31%
Jornalista : Celestina Teles
Editór : Cancio Ximenes
