INTERNASIONÁL, HEADLINE, POLÍTIKA

Timor-Leste hato’o solidariedade ba Turkia no Síria

Timor-Leste hato’o solidariedade ba Turkia no Síria

Foto kópia husi GPM.

DILI, 07 fevereiru 2023 (TATOLI) – Governu Timor-Leste hato’o solidariedade no kondolénsia kle’an ba Turkia no Síria ne’ebé sai vítima ba rai-nakdoko ne’ebé akontese iha 06 fevereiru 2023.

“Lori povu Timor-Leste nia naran, Governu hato’o ninia kondolénsia ba família no amigu vítima husi rai-nakdoko maka’as ho magnitude 7,8 iha eskala Richter, ne’ebé akontese horisehik, iha sudeste Turkia no kauza destruisaun ne’ebé boot iha país ne’e no iha nasaun viziña Síria”, Ministru Prezidénsia Konsellu Ministru, Fidelis Magalhães, hato’o liuhosi nota ne’ebé Agência Tatoli asesu.

Timor-Leste manifesta mós ninia solidariedade ba Governu no Povu Turkia no Síria ne’ebé enfrenta efeitu husi katástrofe ida ne’e.

Porta-vóz Governu Dualuk afirma katak “ami-nia sentimentu ba família ne’ebé lakon sira-nian ema ne’ebé sira hadomi no ami hakruuk ba sira ne’ebé nafatin determinadu hodi buka vítima sira ne’ebé sei moris no hodi apoia populasaun sira ne’ebé afeta hosi katástrofe ida ne’e. Iha loron difisil sira hanesan ne’e, Timor-Leste solidáriu ho Governu no povu turku no síriu, iha dezafiu sira ne’ebé sira hasoru iha semana no fulan sira tuirmai”.

Tuir balansu ikus ne’e, konfirma ona ema na’in-3.800 resin lakon vida iha país rua ne’e, ho espesialista admite katak númeru totál bele aumenta liután. Ema rihun ba rihun hetan kanek no edifísiu rihun lima resin monu namtate.

Husi kedas rai nakdoko prinsipál ne’ebé akontese la kle’ur hafoin tuku 4 dadeer, kilómetru 33 husi kapitál provínsia Gaziantep, relata mós rai nakdoko atus ba atus tuituir mai, ne’ebé akontese iha sudeste Turkia nian.

Governu Timor-Leste louva serbisu autoridade husi país afetadu sira nian iha sira-nian serbisu buka no salva, iha kondisaun ne’ebé susar tebetebes.

Jornalista: Antónia Gusmão

Editora: Maria Auxiliadora

iklan
iklan

Leave a Reply

iklan
error: Content is protected !!