Estrada Laga-Baguia kompañia preparadu halo konstrusaun
DILI, 08 fevereiru 2023 (TATOLI)— Ministru Obras Públika (MOP), Abel Pires, hateten prosesu reabilitasaun estrada ligasaun Laga, Baguia, no Quelicai munisipiu Baucau ba Ossú, munisipiu Viqueque preparadu atu hahu konstrusaun, tanba ekipamentu pejadu no kompañia prontu hahu servisu.
“Prosesu reabilitasaun estrada ne’e, kompañia no sira ne’ebé halo superviziona iha terrenu ona, tribunal mós fó ona vistu ba rai, no orsamentu indeminizasaun ba komunidade afetadu mós tranfere ona ba Banku Nasionál Komérsiu Timor-Leste (BNCTL). Entaun laiha tan kestaun administrativu ne’ebé atu impede. Ho ida ne’e, kompañia preparadu ona hein atu hahu servisu,” Abel Pires hateten ba Tatoli iha Palásiu Governu, Dili, kuarta ne’e.
Nia isplika, objetivu implementa projetu ne’e tanba Governu hakarak promove konetividade tuir padraun estrada munisipál hodi kontribui ba dezenvolvimentu sósiu-ekonómiku iha área rurál.
Notisia relevante : Estrada Laga-Baguia sei konstrui iha 2022
Prosesu reabilitasaun estrada ne’e rasik antes ne’e Primeiru-Ministru, Taur Matan Ruak, halo ona lansamentu fatuk dahuluk iha loron 09 dezembru 2022.
Antes ne’e, Governu halo lansamentu estrada diresaun rua iha fatin diferente, hanesan estrada reabilitasaun postu Quelicai, munisipiu Baucau bá postu Ossu, minisipiu Viqueque, Nahareka hala’o iha área Uai-aka, suku Abafala no estrada diresaun postu Laga bá Baguia, munisipiu Baucau, hala’o iha suku Soba.
Estrada postu Quelicai rasik ho distánsia kilómetru 22,7 no luan metru 7, komposta hosi aspál metru 4, alargamentu metru 1, ombru metru 2, dreinajen, morru protesaun, sinál tráfegu no kuda ai-oan iha fatin risku.
Enkuantu, estrada diresaun Laga-Baguia purvolta kilómetru 38 ho luan metru 6, responsável hosi empreza Norinco Internasional Corporation, ho kustu projetu millaun $21,7.
Aleinde ne’e, Diresaun Nasionál Estrada, Ponte no Kontrolu Cheia hosi MOP prevee orsamentu iha fundu infraestrutura ba tinan fiskál 2022 hamutuk $16.547.661,76.
Durasaun reabilitasaun estrada ba fulan-18, ne’ebé responsável hosi empreza Chongqing Internasional Construction no supervizaun hosi empreza PY konsep perunding Sdn Bhd hosi Malázia, ho durasaun kontratu fulan-18 ho kustu $452.122.
Jornalista : Arminda Fonseca
Editora : Armandina Moniz
