DILI, 09 fevereiru 2023 (TATOLI) – Xefe Suku Motael, Postu Administrativu Vera Cruz, Luís António Viegas, informa katak populasaun hamutuk na’in-619 husi uma-kain 150 nia naran latama iha lista cesta básica.
Benefisiáriu cesta básica Suku Motael hamutuk 6.752, maibé naran iha lista atu simu produtu lokál faze daruak nian iha de’it 6.133.
“Lista benefisiáriu ne’e dezde distribuisaun cesta básica faze dahuluk nian, maibé iha daruak ne’e kuaze aldeia ida naran laiha lista. Ne’ebé, bainhira empreza fornesedór hamutuk ho ministériu implementadór foin lalais lori lista ne’e lahanesan lista ne’ebé ami iha”, autoridade lokál ne’e hatete ba Agência Tatoli, iha sede Suku Motael.
Nia hatutan bainhira komfirma ba iha Ministériu Koordenadór Asuntu Ekonómiku (MKAE) katak lista sira ne’e simu hosi Ministériu Administrasaun Estatál (MAE).
“Maibé realidade hatudu katak lista hosi MAE no ami-nian hanesan, signifika benefisiáriu ne’e hamutuk 6.752 henesan ho ida faze dahuluk ne’e. Entaun, sira mak fó dadus laloos ba empreza tanba dadus ne’ebé iha ha’u foti hosi MAE, ne’ebé klaru hela”, nia kestiona.
Tanba ne’e, xefe suku deside suspende distribuisaun cesta básica iha Motael hodi rezolve tiha lai sira ne’ebé naran laiha lista. Bainhira kompletu ona maka bele realiza distribuisaun no tuir loloos ne’e realiza ona iha domingu (05/02).
“Kuandu naran laiha nafatin maka ami deside lasimu hotu, se la’e mosu diskriminasaun katak balun simu no balun laiha, tanba reklamante mós lakohi ona. Realidade maka iha faze dahuluk ne’e iha reclamante, maibé larezolve”, nia haktuir.
Xefe suku ne’e kestiona mós empreza ne’ebé toma konta ba distribuisaun katak bainhira atu fahe cesta básica tenke foti lista hosi suku, maibé realidade laiha.
Empreza Coqiadygs Unip. Lda mak sai manan-na’in hodi distribui cesta básica iha Suku Motael no Ministériu Turizmu, Komérsiu no Indústria mak responsabiliza ba suku refere.
Notísia relevante: Benefisiáriu 6.725 iha Motael sei simu Cesta Bázika iha 15 janeiru
Jornalista: Antónia Gusmão
Editora: Maria Auxiliadora
