Deputadu sira ‘triste’ haree direta kondisaun estrada Balibo-Maliana
BOBONARO, 09 fevereiru 2023 (TATOLI) – Reprezentante povu sira hosi uma fukun Parlamentu Nasionál ‘triste’ haree direta kondisaun estrada hosi postu administrativu Balibo to’o postu administrativu Maliana Vila, munisípiu Bobonaro.
Nune’e Komisaun E ne’ebé trata asuntu infraestrutura hosi Parlamentu Nasionál, preokupa ho kondisaun estrada ligasaun hosi suku Batugade to’o postu administrativu Balibo inklui hosi Ponte Nunura to’o postu administrativu Maliana vila, munisípiu Bobonaro.
Deputadu Marcos Xavier, reforsa prekupasaun kona-bá estrada urbana Maliana vila to’o Balibo nia parte levanta beibeik durante reuniaun plenaria, maibé sira-nia mandatu atu remata ona mós governu seidauk konsege rezolve.
Notísia relevante: Prosesu konkursu públiku ba estrada urbana Maliana kuaze konklui
“Ha’u haree iha notísia dehan estrada Maliana ne’e iha tenderizasaun (konkursu públiku) ona, agora fulan-neen ona mós ita seidauk rona nia rezultadu, ne’ebé ami-nia mandatu hela de’it fulan hira mai hasoru amu Bispu iha leten ami mós moe fali,” Deputadu Bankada CNRT ne’e hateten durante halo audiénsia ho autoridade Bobonaro no kargu xefia sira, kinta ne’e.
Relasiona ho asuntu ne’e Deputadu Maliana oan ne’e ezije ba ministériu kompetente atu aselera prosesu konkursu públiku ne’e nune’e bele implementa projetu refere iha tinan ne’e.
“Ne’ebé Maliana nia ne’e labele akontese tán hanesan iha Baguia nian ne’e, tender ema manán tiha ona, agora Xina ne’e dehan nia aman ka avó mate ba tiha nia rai hodi hotu osan, projetu ne’e la lao,” membru komisaun E ne’e dehan.
“Ami bele ko’alia iha parlamentu, maibé autoridade sira tenke ezije katak ita ba iha munisípiu seluk nia populasaun oituan de’it nia dalan ne’e kabeer, agora ita mai hosi Dili ne’e ita-nia liman iha karik maibé to’o Maliana tangan di atas fali,” nia akresenta.
Sekretáriu Komisaun E, Deputada Maria Anabela Sávio, observa katak iha munisípiu seluk kauze estrada di’ak hotu ona, falta balu de’it, maibé estrada nasionál hosi Batugade to’o Balibo liuliu estrada urbana Maliana vila tinan barak ona seidauk iha mudansa.
“Ha’u triste oituan dalan hosi Dili mai Maliana, hanesan ohin deputadu Marcos hateten tangan di atas mai to’o Balibo liu oituan mai ita la’o dalan di’ak, depois mai ponte Nunura to’o Maliana ita haree la di’ak, maibé karreta sira ne’e mesak didiak de’it, ema matan-tomak seidauk mai Maliana bele dehan Maliana estrada mesak kapas-kapas de’it, maibé realidade ha’u haree lakohi mai tiha de’it,” Deputada Bankada FRETILIN ne’e preokupa.
Tuir informasaun ne’ebé Deputada ne’e asesu katak estrada sira hosi Balibo ne’ebé aspál ona ladún iha kualidade, liuliu iha parte área Manuten-dodok, suku Leolima.
“Estrada ne’e rai mamar, tuir tékniku sira-nia haree tahu, hanesan rai natar sira-ne’e, ne’ebé sira sei buka alternativu seluk atu muda tiha estrada ne’e, maibé loos ka lae,” reprezentante povu ne’e preokupada.
Biban ne’e, Deputadu Domingos Carvalho de Araújo, sente triste haree kondisaun estrada ne’ebé liga hosi ponte Nunura, Tunubibi to’o ponte SoSo, Maliana.
“Loos duni, hosi Tunubibi nian ne’e piór liu fali Natarbora ninian, sa’e ba fahi-nehan sira-ne’e, estrada ida Maliana nian ne’e karreta kiik sira liu ba mai halonusá, dalan ku’ak hotu ne’e,” nia dehan.
Enkuantu iha tersa loron 07 fevereiru ne’e, Ministru Obras Públika, Abel Pires, ho ekipa tékniku sira halo ona levantamentu dadus ba kondisaun estrada refere.
Antes ne’e, Governu liuhosi reuniaun Konsellu Ministru aprova ona projetu ne’ebé aprezenta hosi Ministru Obra Públika, Abel Pires, hodi autoriza prosedimentu aprovizionamentu estrada urbana Maliana pakote I ho valór globál estimativa $16.314.392,06.
Enkuantu, estrada urbana Maliana pakote II no estrada prinsipál ho estimasaun valór globál $23.587.019,36.
Notísia relevante:Ministru Abel Pires observa ona kondisaun estrada Galusapulu
Jornalista : Sérgio da Cruz
Editór : Evaristo Soares Martins
