Ekipa PNDS hahú konstrui fali UNP iha Lautém ne’ebé paradu

DILI, 09 fevereiru 2023 (TATOLI)—Sekretária Ezekutiva Sekretáriadu Tékniku Programa Nasionál Dezenvolvimentu Suku (ST-PNDS), Claudinha Soares Pinto, hateten ekipa tékniku hosi PNDS hahú fali halo konstrusaun Uma Naroman ba Povu (UNP) iha suku Sarelau ne’ebé antes ne’e sai polemika iha públiku.
Notísia Relevante: Governu rejeita informasaun PNDS hapara konstrusaun UNP iha Lautém

“Ekipa konsege Observa mós konstrusaun UNP hosi benefisiáriu António ne’ebé foin daudauk hasoru problema katak prosesu konstrusaun nafatin la’o ho di’ak. Iha ne’ebé realidade hatudu katak badaen sira kontinua hala’o hela serbisu hanesan baibain, signifika katak informasaun ne’ebé espalla ba públiku ne’e la loos. UNP Suku Serelau, munisípiu Lautém hahú fali ona ninia konstrusaun fíziku no hein de’it atu konklui, tanba iha laran ne’e nahe ona no reboka hotu ona,” Claudina Soares Pinto hateten ba Agência Tatoli liuhosi telefónika, kinta ne’e.
Sekretária ne’e hateten, progresu atividade konstrusaun UNP faze dahuluk iha aldeia Adavari, suku Serelau kuaze konklui hotu ona no iha tempu badak sei entrega ba benefisiáriu, no ekipa nasionál atu garantia katak atividade konstrusaun nafatin implementa tuir planu ne’ebé termina ona.
Iha aldeia Poruvari, suku Serelau, nia hateten, konstrusaun Uma Naroman ba Povu (UNP) faze daruak nian unidade 10 atinje ona 50%.
Konstrusaun Uma Naroman ba Povu (UNP) iha faze dahuluk nian ne’e, Governu prevee orsamentu rihun $25 ba uma 1.254 ne’ebé konstrui iha territóriu nasionál.
Governu liuhosi Ministériu Finansa aloka orsamentu besik millaun $8 atu kontinua programa refere, maibé ida-ne’e la to’o atu hala’o iha suku hotu-hotu tanba redusaun 75% hosi orsamentu ne’ebé aloka iha tinan ida-ne’e.
Tanba ne’e, deputadu sira propoin tan osan hamutuk millaun $63,6 hosi MAE liuhosi PNDS bele implementa Uma Kbiit La’ek iha 2022, atu aumenta uma 10 kada suku nune’e Governu prontu atu implementa programa ida-ne’e kontinua implementa tan UNP + A ho B ho nia orsamentu millaun $25.
Jornalista : Osoria Marques
Editór : Cancio Ximenes

