iklan

LAUTEIN

Governu rejeita informasaun PNDS hapara konstrusaun UNP iha Lautém

Governu rejeita informasaun PNDS hapara konstrusaun UNP iha Lautém

Konstrusaun Uma Kbiit Laek ba povu kbiit laek sira. Imajen/Mídia MAE.

DILI, 02 fevereiru 2023 (TATOLI)—Ministru Administrasaun Estatál (MAE), Miguel Pereira de Carvalho, rejeita informasaun falsa katak Programa Nasionál Dezenvolvimentu Suku (PNDS) hapara konstrusaun Uma Naroman ba Povu (UNP) ba benefisiáriu ida iha suku Serelau, munisípiu Lautém.

Notísia Relevante: Governu inagura UNP hamutuk 19 iha Liquiça

“Informasaun dehan hapara konstrusaun UNP iha Lautém ne’e falsa no sala. Informasaun loloos mak mak Programa Nasionál Dezenvolvimentu Suku (PNDS) ne’e halo hela uma ba ita-nia povu sira hotu iha Timor-Leste, la haree ba kór no partidu,” Ministru Miguel hateten ba jornalista sira iha hafoin inaugura Uma Naroman ba Povu iha Covalima, kinta ne’e.

Governante ne’e hatutan, sé mak dehan uma ne’e la halo tanba kór partidu ne’e laloos, tanba ida-ne’e hanesan politiza de’it informasaun.

“Agora akontese iha Lautém ne’e, ita-nia traballadór ne’ebé halo uma ne’e sei hala’o ho konstrusaun namanas hela, entaun sé ema halo uma namanas labele interompe tanba bainhira kompañia ida mak halo uma hosik nia konklui tiha no entrega ona ba komunidade ka na’in ba uma ne’e mak hafoin halo saida ba uma ne’e, ninia direitu maibé bainhira uma ne’e seidauk hotu labele halo aktu ne’ebé ita haree hamutuk iha ne’ebá,” nia klarifika.

Governante ne’e hateten, PNDS la sobu, PNDS la hapara no PNDS ba buka hatene de’it informasaun saida mak akontese iha ne’ebá.

“Ha’u foin fó instrusaun ba Sekretária PNDS katak kontinua halo uma no dehan la hapara no tuir informasaun katak unidade benefisiáriu ba UNP ne’e defisiénte, no iha ema balun uza hodi esplora sasán sira hanesan ne’e,” nia dehan.

Entretantu Sekretária Ezekutiva Sekretáriadu Téknika-PNDS, Claudinha Soares Pinto, hatutan katak uma ne’e la’ós hapara totál maibé pendente provizóriu de’it bainhira ekipa PNDS hamutuk ho autoridade lokál rezolve tiha problema lai.

“Ita la hapara konstrusaun UNP ne’e ho totálmente maibé ita pendente provizóriu, nune’e rezolve tiha problema ka dezentendimentu iha ne’ebá,” nia dehan.

Notísia Relevante: Uma Naroman ba Povu lori povu ba naroman

Jornlista : Osória Marques

Editór     : Cancio Ximenes

iklan
iklan

Leave a Reply

iklan
error: Content is protected !!