DILI, 09 fevereiru 2023 (TATOLI)—Adjuntu Sekretáriu Jerál partidu FRETILIN, Antoninho Bianco, informa rezultadu konferénsia nasionál FRETILIN nian foin lalais ne’e aprova ona estatutu partidu nian no liña jerál kompromisu eleitorál ba eleisaun Parlamentár 2023.
Notísia Relevante: FRETILIN realiza konferénsia nasionál diskute liña jerál kompromisu eleitorál
“Klaru ne’e aprova ona liña jerál, ami labele hateten iha ne’e, tanba ne’e ami-nia programa atu ba ukun. Agora ami labele hatete liña orientasaun jerál no nia prosesu elaborasaun la’o hela depois to’o tempu besik ami tenke hato’o,” Antoninho Bianco hateten ba jornalista sira Parlamentu Nasionál (PN), kinta ne’e.
Konferénsia ne’e aprova mós estatutu partidu nian ne’ebé antes né iha artigu hamutuk 105 agora aumenta ba 112.
“Estatutu anteriór iha artigu hamutuk 105, depois estatutu foun ne’e aumenta ba 112,” nia dehan.
Atuál Vise Bankada Fretilin iha PN ne’e hateten, artigu ne’ebé aumenta mak ko’alia kona-ba lideransa troika iha Fretilin, seluk mak konsellu konsultivu partidu Fretilin nian ne’ebé kompostu hosi eis Prezidente, eis Sekretáriu Jerál no eis veteranu sira iha frente armada, klandestina no diplomátika ne’ebé to’o agora enkuadra iha nivel nasionál, munisipál, postu to’o suku, hodi valoriza ema luta na’in sira.
Nia hateten, nia regulamentu Komisaun polítika nasionál sei define óinsá konsellu konsultivu ne’e bele hala’o serbisu atu haforsa partidu Fretilin.
Aleinde hamosu órgaun komisaun espesializada ne’ebé atu reforsa komisaun polítika nasionál ida-ne’e, kuadru polítiku sira-ne’ebé iha profisionál doutoradu ka sientista iha Fretilin nian, sei fahe iha komisaun espesializada ne’e hodi analiza asuntu ekonómia, polítika, sosiál no sira seluk.
Buat seluk, nia dehan, atu kria nukleu iha nivel kra’ik la’ós to’o aldeia de’it maibé to’o baze, atu bele tun ba kraik enkuadra lidér naturál sira hodi habelar informasaun Fretilin nian, no Estadu nian relasiona ho lei saida karik bele divulga hodi ema intende saida mak la’o iha Estadu ne’e.
Tanba ne’e, nia hateten, benefísiu hosi revizaun estatutu ne’e ba partidu tanba mudansa estatutu ne’e iha organizasaun ne’e iha pontu lima, ida mak ema dehan lidér entaun estrutura mak define sé mak atu sai lidér partidu nian no sé mak atu sai ba lidér ukun ne’e tenke regula iha estatutu, entaun oinsá mak líder sira atu mosu iha organizasaun ne’e estatutu mak regula.
Iha estatutu ne’e regula óinsa mak atu sai militante no oinsa ko’alia ema lidér iha laran ne’e tuir regra no militante hatene.
No estatutu mós regula nia prinsípiu regra ne’ebé estabelese iha laran,ezemplu dxsiplina iha konferénsia no komite sentrál óinsá regula hotu, óinsa kontribui hosi kuadru no militante.
Seluk mak partidu tenke iha programa ne’ebé estabelese liña jerál iha ne’eba orienta ba partidu, no meiu fasilidade sira.
Jornalista : Nelson de Sousa
Editór : Cancio Ximenes
