COVALIMA, 09 fevereiru 2023 (TATOLI)—Kondisaun ponte Maligirik ne’ebé lokaliza iha aldeia Orun, suku Ogues, postu administrativu Maucatar ne’e ameasadu atu kotu tanba kondisaun ponte nia sorin balun kotu tiha ona.
Reprezentante komunidade Ogues, Calistro do Carmo, husu ba autoridade kompotente atu toma atensaun lalais ba ponte ne’ebé sorin balun kotu, nune’e belé fasilita ema no transporte halo movimentu husi Suai ba Maucatar, Fatululik no to’o Bbobonaro.
“Ami husu Governu atu bele hadi’a lalais ponte ne’e tanba agora ponte ne’e kotu, ema labele halo movimentu ba-mai hosi Suai ba postu administrativu Maucatar no ba Fatululik liubá Bobonaro,” Calistro do Carmo hateten ba jornalista sira, iha aldeia Orun, suku Ogues, kinta ne’e.
Ponte Malirigik sorin balun kotu ne’e tanba iha kuarta (8/02/2023) ne’e, maizumenus lorokoraik udan boot halo korrente Mota Karau Ulun hodi ko’a ponte Maligirik sorin kotu, no ameasa movimente transporte públiku ba no mai.
Diretor servisu protesaun sivil no jestaun dezastre naturál, Quintino da Costa, hateten ponte Maligirik kotu difikulta movimentu transporte públiku no ambulánsia labele tula ema moras hosi Maucatar no Fatululik mai Suai, nune’e presiza halo intervensaun imediatamente.
“Ho akontesementu udan-boot, halo ita-nia infranstrutura báziku hanesan estrada no ponte kotu. Ho ida-ne’e transporte-sira labele liu ba-mai liuhosi hosi Suai ba Maucatar liu-ba Fatululik, karreta ambulánsia mós labele tula ema mate ba Fatululik no Maukatar, tanba ne’e Governu tenke halo intervensuan imediatamente,” nia dehan.
Administradór Munisípiu Covalima, Francisco de Andrade, halo observasaun iha terrenu no bia parte komunika ona ba Ministru Obra Públika atu haree urjentemente ba asuntu refere.
“Molok ha’u mai iha ne’e, ha’u simu telefone hosi komandante APC Covalima, no nia haruka foto mai ha’u, entaun foto sira-ne’e ha’u haruka ona ba ita-nia ministru obra publika, maibé seidauk iha resposta. Ha’u mós kontaktu ona ba Obra Publika iha Covalima atu mobiliza ekipamentu hodi halo intervensaun ba ponte kotu ne’e,” nia hateten.
Jornalista : Celestina Teles
Editór : Cancio Ximenes
