ANAAA sei avalia IBTL-universidade akreditadu ualu ho orsamentu $205.283
DILI, 10 fevereiru 2023 (TATOLI)–Diretór ezekutivu Ajénsia Nasionál Avaliasaun Akreditasaun Akadémiku (ANAAA), Nilton Diamantino Paiva, hateten iha maiu no abríl ne’e ANAAA sei hala’o avaliasaun institusionál ba Institutu Superiór Privadu Boaventura Timor-Leste (IBTL) no mós avaliasaun ba kursu 35 iha universidade akreditadu ualu (8) ho orsamentu $205.283.
Notísia Relevante: Fulan oin, ANAAA hahú halo avaliasaun no akreditasaun ba instituisaun ualu
Nia hatutan, nia parte asume kargu nu’udar diretór ezekutivu ANAAA iha 27 dezembru 2022 hahú servisu iha loron 02 janeiru 2023 maibé servisu sira-ne’ebé mak nia halo daudaun ne’e mai hosi planu 2022 nian.
”Tinan ida hakarak ka lakohi IBTL tenke tama ona ba prosesu avaliasaun akreditasaun institusionál tanba sira-nia prazu ba lisensiamentu operasionál termina ona. Ne’eduni ANAAA tenke kumpre proposta avaliasaun akreditasaun IBTL nian atu haree sira-nia preparasaun sira iha tinan ida-ne’e,” nia hateten ba Agência Tatoli iha edifísiu ANAAA Balide, sesta ne’e
Agora, nia dehan, halo uluk avaliasaun institusionál bainhira IBTL hetan ona akreditasaun mak sei fó fali tempu ba sira atu prepara-an hodi tama ba avaliasaun programatika ka avaliasaun ba kursu sira-ne’ebé mak eziste iha IBTL.
Atividade avaliasaun ba kursu no avaliasaun ba institusionál ne’e, ANAAA prevee orsamentu ho montante $205.283 ne’e mak divide ba atividade avaliasaun kursu 35 ho orsamentu $201.783 no ba avaliasaun institusionál mak $2.500.
Entretantu, kursu 35 ne’ebé mak atu hetan avaliasaun iha tinan ida-ne’e mai hosi universidade públiku no privadu sira hanesan UNTL. UNITAL, IOB, DIT, ISFIT, ICS, ISC no mós Canossa.
Atividade sira ne’e sei realiza iha maiu to’o outubru, maibé molok atu to’o iha ne’ebá agora daudaun hahú hosi 09 janeiru to’o 16 fevereiru, ANAAA sei tun ba terrenu hodi halo sensibilizasaun, atu nune’e instituisaun ensinu superiór públiku no privadu sira-ne’ebé ninia kursu tama iha avaliasaun ba tinan ida-ne’e.
Akompañamentu ANANA nian iha terrenu ne’e hodi hamutuk ho tékniku sira atu ajuda parte quality ansurance iha kada universidade sira, atu bele hatene prince self asesment report, tanba self asesment report ne’e mak sei deskreve ka esplika standar 10 ne’ebé maka ANAAA provide hela ba universidade sira atu prenxe.
Akompañamentu ne’e mós atu ajuda IQA dosente, dekanu no xefe departamentu sira bele intende ho loloos bainhira painél nasionál no internasionál tun ba halo akreditasaun universidade sira bele hetan resposta no responsabilidade ba dokumentu self asesment report ne’ebé mak sira prenxe ona.
Entretantu iha tinan kotuk, ANAAA mós halo ona avaliasaun ba kursu 25 ne’ebé konsege avansa ona ba akreditasaun, no rezultadu sira-ne’e fó sai ona iha 27 dezembru 2022.
Rezultadu akreditasaun ba kursu 25 ne’e seidauk públika iha jornál da Repúblika, maibé hein katak ohin enkontru ANAAA nian ho konsellu diretivu ne’e bele hetan ona aprovasaun atu kursu 25 ne’e bele publika ona iha Jornál da Repúblika.
Notísia Relevante: ANAAA prevee $442.099 ba programa prioridade rua iha OJE 2023
Jornalista : Tomé Amado
Editór : Cancio Ximenes
