Benefisiáriu UNP+ B iha Caicoli sei simu zinku iha marsu
DILI, 10 fevereiru 2023 (TATOLI)—Xefe suku Caicoli, postu administrativu Vera Cruz, munisípiu Dili, Hipólito Ximenes Marques, hateten benefisiáriu Uma Naroman ba Povu (UNP) Plus B (UNP+ B) iha Caicoli sei simu zinku iha fulan-marsu nia hahú.
Notísia Relevante: MAE sei distribui materiál konstrusaun UKL+ ba benefisiáriu iha agostu
Tuir planu, nia dehan, Governu liuhosi Ministériu Administrasaun Estatál (MAE) mak sei distribui zinku ba benefisiáriu sira.
“Kona-ba Uma Naroman ba Povu, ami hosi suku Caicoli benefisiáriu ba UNP Plus B hamutuk 37 mak sei simu zinku iha inisiu fulan-marsu, tanba daudaun ne’e Governu distribui ona iha postu administrativu Cristo Rei nian,” Lider komunitária ne’e hateten ba Agência Tatoli iha nia kna’ar fatin, Caicoli, sesta ne’e.
Nia dehan, kada aldeia iha benefisiáriu hitu (7) maibé iha aldeia Zero Um Sentru Unidade no aldeia Quarto Fohorai-Boot mak hetan ualu (8), hosi total populasaun iha Caicoli hamutuk uma kain 3.705.
Antes ne’e, Governu implementa ona projetu Uma Kbiit La’ek (UKL) ba família kbiit laek sira iha territóriu Timor-Leste, maibé iha tinan 2022 liuhosi orsamentu retifikatifu introdús tan sub programa UKL+ ho orsamentu millaun $25.
Notísia Relevante: Governu sei troka linguajen Uma Kbiit Laek ba Uma Naroman ba Povu
Jornalista : Osória Marques
Editór : Cancio Ximenes
