DILI, 10 fevereiru 2023 (TATOLI)–Xefe Unidade Planeamentu no Implementasaun iha Programa Nasionál Dezenvolvimentu Suku (PNDS), Flávio Amaral, hateten Governu liuhosi Programa Nasionál Dezenvolvimentu Suku (PNDS) distribui ona zinku hamutuk tahan 370.600 ba benefisáriu Uma Naroman ba Povu plus B (UNP+ B) hamutuk 3.885 iha munisípiu 11 iha Timor-Leste.
Relevante: MAE sei distribui materiál konstrusaun UKL+ ba benefisiáriu iha agostu
“Kategória ba UNP tipu plus B ne’e ita halo distribuisaun ona zinku hamutuk tahan 370.600 hodi totál zinku prepara ba benefisiásriu 3.885. Iha tempu badak, ita sei kontinua ho munisípiu Ataúro ho Dili nian tanba munisípiu seluk ita distribui ona,” nia dehan ba Agência Tatoli hafoin partisipa formasaun ba ekipa tékinika nasionál sira, iha salaun Laline Larigutu, sesta ne’e.
Kona-ba Uma Naroman ba Povu Plus A (UNP+ A) tinan 2022 nian, nia dehan, ba tinan ida-ne’e implementa hotu ona maibé seidauk finaliza de’it.
“UNP plus A ne’e nia progresu implementasaun hotu-hotu la’o ona no ita haree ona nia fizikamente liu-liu iha munisípiu Lautém mak fulan oin bele inaugura ona, no ba programa refere ita foin mak inaugura dahuluk mak Lautém nian. Hein katak, tinan ne’e bele finaliza no konklui programa ne’e,” nia dehan.
Antes ne’e, Governu implementa ona projetu Uma Kbiit Laek (KL) ba família kbiit laek sira iha territóriu Timor-Leste, maibé iha tinan 2022 liuhosi orsamentu retifikatifu introdús tan sub-programa UKL plus tipu A ho B ho orsamentu millaun $25.
Jornalista : Osoria Marques
Editór : Cancio Ximenes
