DILI, 10 fevereiru 2023 (TATOLI)–Xefe Unidade Planeamentu no Implementasaun iha Programa Nasionál Dezenvolvimentu Suku (PNDS), Flávio Amaral, hateten tinan ne’e Governu prevee millaun $61 hodi konntinua implementa programa Uma Naroman ba Povu (UNP) no UNP+ B iha territóriu nasionál.
“Governu kontinua ba programa UNP ho UNP+ B ba tinan 2023, mak UNP ita sei konstrui uma kuaze 3.451 no UNP+ B fahe zinku hamtuuk 4.107 ho nia orsamentu ne’ebé Governu aloka liuhosi PNDS hamutuk $61.721.500,08,” Flávio Amaral hateten ba Agência Tatoli, hafoin partisipa formasaun ba ekipa téknika nasionál sira iha salaun Laline Larigutu, sesta ne’e.
Daudaun ne’e, nia dehan, ekipa téknika nasionál tuir hela formasaun hodi hasa’e sira-nia kapasidade, nune’e kontinua fó formasaun ba ekipa munisipál sira hodi bele implementa programa refere iha tinan ne’e.
“Tuir programa Governu nian, normalmente antes atu implementa tenke tuir formsaun sira mak daudaun ne’e ita-nia ekipa tuir hela durante loron haat ne’ebé hahú loron 07-10 fevereiru, hafoin halo sensibilizasaun no halo levantamentu ba dadus. Nune’e ita sei implementa programa ne’e iha inisiu fulan-maiu tinan ne’e,” nia dehan.
Ba programa ne’e, tuir nia, komunidade sei ba direta aldeia mak rejistu hodi aldeia submete fali ba suku, postu administrativu no parte relevante sira.
“Mekanizmu ba kandidatu sira uluk ne’e iha ekipa ida iha suku rekolla dokumentu maibé agora lae, kandidatu hotu-hotu ba direta aldeia depois mak submete ba postu depois mak halo selesaun ba dokumentu sira, hafoin ekipa téknika tun halo verifiksaun,” nia hateten.
Tinan 2023 ne’e, sei halo revizaun ba dekretu-lei hodi la halo sasukat hanesan uluk katak benefisiáriu oan laiha sei lahetan maibé agora komunidade hotu-hotu iha direitu ka livre depois mak halo selesaun dokumentu sira.
Jornalista : Osoria Marques
Editór : Cancio Ximenes
