OÉ-CUSSE 10 fevereiru 2023 (TATOLI) – Delegasaun hosi Embaixaxa Repúblika Indonézia (KBRI, sigla indonézia), kinta ne’e hasoru malu Prezidente Autoridade RAEOA, Arsénio Paixào Bano, hodi deskuti setór rua ba futuru kria bolsa estudu ba timor-oan hodi kontinua estudu iha universidade sira iha Repúblika Indonézia.
Iha sorumutu ne’e, parte rua diskute asuntu rua ne’e maka setór edukasaun no setór saúde hodi hasa’e koñesimentu no abilidade iha akadémika ba profesór sira ho grau baxarelatu no lisensiatura no mós profisionál saúde sira liuhosi bolsa estudu.
Hafoin remata enkontru, Xefe Delegasaun hosi KBRI iha Timor-Leste, Phil Ikhfan Haris, ne’ebé trata asuntu Edukasaun no Kultura Attache, informa iha vizita KBRI iha Oé-Cusse, hodi diskute kona-bá bolsa estudu ba timor-oan sira ba setór edukasaun no saúde, iha futuru bele estudu iha Indonézia, tanba iha universidade sira hanesan Airlanga, Sumatra Utara UNDANA, husu joven sira iha Timor-Leste liuliu Oé-Cusse oan bele kontinua sira-nia estudu iha setór saúde ba foku ba espesialista nehan nian.
“Ami diskute asuntu rua ne’e no sei esforsu profesór sira-ne’ebé iha Oé-Cusse liuliu baxarelatu (D3) no lisensiatura (S1) bele kontinua sira-nia nível edukasaun ho tipu tolu, primeiru semester eskola online, segundu semester prátika no teória no ikus prepara hakerek teze ka fokaliu kona-bá problema edukasaun ne’e akontese iha Timor-Leste, liuliu Oé-Cusse,” Phil Ikhfan Haris, informa ba jornalista sira iha Oé-Cusse.
“Iha loron sábadu to’o segunda semana oin, iha ona selesaun dokumentu ba kandidatu sira atu hahú prosesu aprendizajen iha fevereiru ne’e, ohin ami informa ba Prezidente Autoridade karik bele iha fulan agostu profionál sira hosi Oé-Cusse iha interese ba programa mestradu ne’e bele estuda mós iha Indonézia tanba universidade sira hanesan UNDANA online, universidade Multimedia Nusantara Kompas nian mós loke klase online, no iha tawaran mós hosi Politeknik Saúde Gorongtalo ba nívek baxarelatu farmasista nian, ” nia katak
Prezidente Autoridade RAEOA, Arsénio Paixão Bano, hateten atu selu espesialista doutór sira atu ba kontinua estudu iha Indonézia iha tinan ida-ne’e, iha ema na’in-hitu.
“Na’in-rua ita selu ona estuda iha nasaun Kuba, na’in-rua sira liu ona halo ona estudu, doutór Estanislau Tafin ho doutora Merita Lafo iha Indonézia, ida iha Jakarta no ida iha Sumatra Utara,” nia katak.
RAEOA hakarak ema Oé-Cusse bele hetan bolsa estudu bele tuir kursu hodi aumenta koñesimentu, tanba ne’e oportunidade di’ak iha fevereiru ne’e Prezidente Repúblika Indonézia ho Primeiru Ministru Timor-Leste, sei selebra akordu kona-bá zona franka ba Nusa Tenggara Timur (NTT) ho Oé-Cusse.
“Entaun ne’e oportunidade di’ak, ita tenki foku liu ba rekursu umanu, tenke aumenta ita-nia koñesimentu ne’e másimu, tán ne’e ha’u agradese ba Atache Pendidikan hosi indonézia iha Dili no mós KBRI iha Oé-Cusse tanba kooperasaun di’ak tebes,” nia orgullu.
Jornalista: Abílio Elo Nini
Editór: Evaristo Soares Martins
