OEKUSI, 10 Abríl 2026 (TATOLI) – Polísia Nasionál Timor-Leste (PNTL) liuhusi Unidade Patrullamentu Fronteira (UPF) ho Tentara Nasionál Indonézia (TNI) liuhusi Satuan Tugas-Pengamanan Perbatasan (Satgas-Pamtas) hamutuk ho Serbisu Transfronteirisu sira ka Pelayanan Lintas Batas Negara (PLBN) sesta ne’e, realiza atividade border security briefing coordination – koordenasaun informasaun kona-ba seguransa fronteira nian, iha postu UPF liña fronteira Santijak suku Nípani sub-rejiaun Pante Makasar, Rejiaun Administrativa Espesiál Oekusi Ambeno (RAEOA).
Notísia relevante:Garante seguransa iha liña fronteira, UPF ho TNI hala’o patrulla koordenada
Komandante UPF, Superentendente Xefe Polísia, Euclides Belo, informa, objetivu husi sorumutu ne’e atu hato’o apresiasaun ba parseria entre Satgas TNI, PLBN no Polísia Repúblika Indonézia (POLRI) tanba ne’e durante períodu tempu jejun paskoa nian, aniversáriu PNTL, no mós durante movimentasaun viajen entidade sira husi Kupang mai Timor-Leste, hatudu kooperasaun di’ak iha liña fronteira, liuhusi atensaun no fasilitasaun ne’ebé efisiente.
“Ha’u hanesan Komandante UPF mai hato’o apresiasaun ba parsériu sira, ida-ne’e mak fundamentu ohin ami bele hala’o. Iha ami-nia fiar depozita liuhusi lei, nune’e ami bele garante seguransa iha liña fronteira, tanba kooperasaun ne’e alvu ne’ebé tenke metin no tenke serbisu hamutuk,” nia hateten iha postu UPF Santijak Sakato, ohin.
Iha sorumutu ofisiál ne’e, nia espera katak ba futuru, kooperasaun ne’e bele kontinua hadi’a no hasa’e liután, nune’e armonizasaun serbisu iha fronteira bele la’o ho di’akliu, seguru no efisiente ba benefísiu rai Timor-Leste tomak.
Notísia relevante:UPF-TNI halo patrullamentu konjunta observa pilár-garante seguransa iha fronteira
Iha biban ne’e, Xefe Seksaun Fasilidade PLBN fronteira Wini, Triwi Ratna, espera katak, liuhusi sorumutu koordenasaun ne’e, bele hametin liután lasu amizade hodi garante Serbisu Transfronteirisu la’o ho seguru.
“Ami hein katak atividade sira hanesan ne’e bele kontinua, tanba liuhusi atividade sira hanesan ne’e, mantein koordenasaun no sinerjia estraordináriu entre nasaun rua – Indonézia ho Timor-Leste. Hein katak, iha futuru, ami bele mantein relasaun bilaterál di’ak, hodi nune’e seguransa no Serbisu Transfronteirisu, liuliu ba ami sira ne’ebé hala’o kna’ar iha fronteira, bele la’o ho di’ak,” nia hateten.
Komandante Stagas-Pamtas, TNI Pos Wini, Sersan Kepala, orgullu tanba liuhusi kooperasaun no komunikasaun bele garante seguransa iha liña fronteira.
“Ami apresia ho konvite husi UPF. Ami hein katak komunikasaun no koordenasaun entre nasaun rua liliu iha liña bele la’o ho di’ak, nune’e metas no objetivu mantein seguransa iha rejiaun fronteira bele mantein nafatin,” nia katak.
Notísia relevante:UPF-TNI komprometidu garante seguransa durante natál no tinan foun iha fronteira
Jornalista: Abílio Elo Nini
Editór: Rafael Ximenes de A. Belo
