COVALIMA, 10 fevreiru 2023 (TATOLI)–Kompañia Unidade Unipesoál, Lda, halo ona normalizasaun ponte Maligirik ne’ebé lokaliza iha aldeia Orun, suku Ogues, postu administrativu Maucatar ne’ebé ameasadu kotu hodi difikulta movimentu transporte públiku hosi Suai ba postu administrativu Maucatar ba Fatululik no ba Bobonaro.
Notísia Relevante: Ponte Maligirik iha Ogues ameasadu atu kotu
“Agora ita haree movimentu transporte públiku la’o hanesan normál ona, tanba kompañia Unidade Unipesoál, Lda, halo ona normalizaun ponte Maligirik ne’ebé sorin balun kotu ona,” Diretór Servisu Munisipál Obra Públika Covalima, Alberto Cardoso, informa ba Agéncia Tatoli, iha resintu AMC, Sukaer Laran, sesta ne’e.
Kompañia Unidade Unipesoál, Lda, hahú halo normalizasaun ba ponte Maligirik iha kinta (9/02/2023) hodi nune’e bele fasilita movimentu ema no transporte públiku hosi Suai ba Maucatar no ba munisípiu viziñu Bobonaro.
Oras-ne’e daudaun Kompañia Unidade halo hela servisu hodi halo normalizaun hodi taka rai ba ponte Malirigik sorin balun kotu, tanba iha loron kuarta (08/02/2023) ne’e ho udan boot ne’ebé korrente Bee-Mota Karau Ulun hodi ko’a ponte Maligirik sorin ameasadu kotu.
Hafoin halo normalizaun ba ponte refere, ekipa hosi nasionál sei mai atu foti dadus tanba bainhira halo normaliza de’it iha tempu udan korrente bee-mota boot halo ponte sempre kotu.
Antes ne’e, Diretór Servisu Munisipal Protesaun Sivil no Jestaun Dezastre Naturál, Quintino da Costa, hateten ponte Maligirik kotu difikulta movimentu transporte públiku no ambulánsia labele tula ema moras hosi Maucatar no Fatululik mai Suai, nune’e presiza halo intervensaun imediatamente.
Tuir observasaun Agência Tatoli nota katak, hafoin kompañia halo normalizasaun ponte Maligirik sorin balun kotu ne’e, movimentu transporte públiku hosi Suai ba postu administrativu Maucatar ba Fatululik to’o Bobonaro la’o hanesan normál.
Jornalista : Celestina Teles
Editór : Cancio Ximenes
