DILI, 10 fevereiru 2023 (TATOLI)—Sekretária Meza Parlamentu Nasionál (PN), Deputada Lídia Norberta, hateten iha segunda (13/02/2023) semana oin ne’e PN sei halo reuniaun plenária hodi hala’o eleisaun ba Komisáriu Komisaun Anti-Korrupsaun (CAC, siglá portugés) foun.
Notísia Relevante: FRETILIN-CNRT: Komisáriu CAC foun tenke hala’o serbisu ho independente
“Horsehik iha reuniaun líder bankada iha diskusaun ona kona-ba atu ajenda ba eleisaun komisáriu CAC. Tuir ajenda plenária ne’ebé iha ona mak segunda-feira semana oin, ita sei hala’o eleisaun ba komisáriu CAC,” Sekretária Meza PN ne’e hateten ba jornalista sira iha PN, sesta ne’e.
Sekretária Meza ne’e seidauk fó sai kona-ba kandidatu komisáriu CAC, maibé atuál Komisáriu CAC, Sérgio Hornai, ninia mandatu kompleta ona tinan haat ne’ebé ramata iha loron 21 janeiru 2023, nune’e Komisáriu foun sei hein eleisaun iha plenária PN.
Antes ne’e, iha 25 janeiru tinan ne’e, Governu liuhosi reuniaun Konsellu Ministru (KM), dezigna José da Costa Ximenes ba Komisáriu CAC ba mandatu tinan haat tuir rejime eskluzividade.
Projetu proposta rezolusaun Parlamentu Nasionál nian ne’e aprezenta hosi Primeiru-Ministru (PM), Taur Matan Ruak.
“Tuir lejislasaun ein vigór, Parlamentu Nasionál sei analiza no vota ba naran ne’ebé hato’o hosi Governu, maske ninia designasaun sei nesesária ba maiória absoluta hosi Deputadu reprezentante sira-ne’ebé prezente. Pelumenus, baluk tolu hosi Deputadu sira-ne’ebé efetividade funsaun sira,” Ministru Prezidénsia Konsellu Ministru (PCM, siglá portugés), Fidelis Manuel Leite Manglhães, hateten hafoin reuniaun KM, iha Palásiu Governu.
Nia hatutan, karik liuhosi votasaun iha PN mak maiória absoluta konkorda ho kandidatu refere, entaun eis Prokuradór Jerál Repúblika (PJR) ne’e sei sai Komisáriu CAC tuir mai.
Jornalista : Nelson de Sousa
Editór : Cancio Ximenes
