OÉ-CUSSE 13 fevereiru 2023 (TATOLI) – Diresaun Rejionál Infraestrutura (DRI), Rejiaun Administrativa Espesiál Oé-Cusse Ambeno fó xamada atensaun ba kompañia Grand Enclave Unipesoál Lda, atu aselera projetu terminál Tono tuir dokumentu kontratu nian.
Projetu terminál Tono ne’e lokaliza iha iha eis merkadu Tono, aldeia Noeninen, suku Cunha, sub-rejiaun Pante Makasar.
“Progresu terminál Tono, depois ita halo enkontru ho kompañia no tékniku, nia halo ona kompromisu ba ita, atu aselera no kumpre kontratu, tanba daudaun atinje ona 15%, materiál onside, ita hein katak kompañia sei laiha difikuldade ruma, DRI ho servisu edifikasaun halo ona xamada ba kompañia no alerta maka’as nune’e bele kumpri kontratu,” Diretór Rejionál Infraestrutura (DRI), Cândido dos Reis Amaral, ko’alia iha Oé-Cusse, segunda ne’e.
Tuir nia, terminál Tono ho modelu lokál, atu akumula transporte públiku no privada, ne’ebé mai hosi parte súl, hosi sub-rejiaun Oésilo, Pássabe inklui inklui Pante Makasar balun.
Tuir nia, razaun konstrui terminál iha Tono atu fasilita movimentu transporte públiku, liuliu transporte terrestre, tanba daudaun ne’e númeru movimentu aumenta beibeik, entaun Autoridade diside konstrui terminál ida, nune’e transporte sira kumpre disiplina.
“Ita haree durante ne’e hamosu problema entre angguna no mikrolete, balu mai hosi foho tama liu sidade, entaun ita kria fatin ne’e bele fahe pasajeiru, angguna to’o de’it terminal ne’e, no mikrolete mak kontinua halo operasaun tama to’o vila”. Nia afirma.
Aliende ne’e mós iha ligasaun ho projetu nasionál estrada ligasaun Pante Makasar ba Oésilo, tanba ne’e maka autoridade iha planu integradu hosi sai pakote ida kona-bá jestaun transporte públiku nian.
“Ita halo xamada verbál, atu mai partisipa enkontru ita husu ba nia, atu aprezenta nia komitmentu no seriedade atu konklui servisu ne’e, tanba atinje ona 15%, ita hein katak nia progresu sei iha mudansa,” nia katak.
Entretantu, kompañia Grand Enklave Unipesoál Lda ezekuta projetu ne’e ho valór kontartu hamutuk $226,017.38. Osan ne’e Autoridade aloka hosi Orsamentu Jerál Estadu (OJE) 2022 ho durasaun servisu durante fulan-haat.
Notísia relevante: RAEOA prevee rihun $226-resin ba terminál transporte públiku iha Tono
Jornalista: Abílio Elo Nini
Editór: Evaristo Soares Martins
