DILI, 13 fevereiru 2023 (TATOLI) – Projetu konstrusaun ba edifísiu Konferénsia Episkopal Timorense (CET, sigla portugés) sei gasta orsamentu millaun $3.
Lansamentu ba obra ne’e hala’o tiha ona iha semana kotuk, iha laletek Debumeta, Dare, Dili, ne’ebé partisipa mós husi Ministru Finansa, Rui Augusto Gomes.
Obra ba edifísiu foun CET ne’e sei responsabiliza husi kompañia Holgapa. “Ho konstrusaun edifísiu foun CET marka tan istória foun ida ba Uma Kreda Katólika Timor-Leste depois de país ne’e selebra tinan atus-lima ezisténsia doutrina Katólika iha rai ida-ne’e”, afirma nota husi Ministériu Finansa.
Iha maiu 2022, iha ámbitu selebrasaun tinan 20 Aniversáriu Restaurasaun Independénsia Timor-Leste, Ministru Finansa, Rui Gomes, no Arsebispu Metropolitana Díli, Dom Virgílio do Carmo da Silva, reprezenta CET asina ona akordu subvensaun públika anuál ho montante millaun $15.
“Iha OJE 2023, Governu aloka millaun $15 iha Dotação Geral do Estado hodi Governu oferese ba Igreja Katólika liuhusi CET atu uza ba atividade ho karakter edukativu, sosiál no seluk tan durante tinan finanseiru 2023. Serimónia asinatura akordu subvensaun publika ne’e sei realiza iha tempu badak nia laran”, Rui Gomes hatete, iha ámbitu lansamentu fatuk dahuluk.
Iha tinan kotuk, Primeiru-Ministru, Taur Matan Ruak, no Prezidente CET, Dom Norberto do Amaral, asina ona Akordu Kuadru ba Implementasaun entre Timor-Leste no Santa Sé ba períodu entre 2022 no 2027.
Partisipa iha serimónia hatuur fatuk dahuluk ne’e mak Dom Norberto do Amaral, Arsebispu Dili, Kardeál Dom Virgílio do Carmo da Silva, Ministru Obra Públika, Abel Pires, Komandante PNTL Munisípiu Dili, F-FDTL, Autoridade lokál inklui populasaun sira.
Jornalista: Antónia Gusmão
Editora: Maria Auxiliadora
