PN aprova alterasaun lei Eleitorál bele uza ba Elpar
DILI, 13 fevereiru 2023 (TATOLI)—Prezidente Repúblika (PR), José Ramos Horta, hateten iha tempu badak mak alterasaun lei Eleitorál ba Parlamentu Nasionál (PN) mak deputadu sira aprova bele uza ba eleisaun Parlamentár (Elpar) 2023.
Notísia Relevante: Prezidente Repúblika dekreta loron eleisaun Parlamentár iha 21 maiu
“Konforme de’it, se tempu badak Parlamentu aprova ona lei foun (proposta alterasaun lei Eleitorál ba Parlamentu Nasionál), ita bele uza lei foun,” PR Horta hatten liuhosi konferénsia imprensa bainhira dekreta loron eleisaun parlamentár 2023 iha Palásiu Prezidensiál Nicolau Lobato, Bairru Pite, segunda ne’e.
Nia hateten, alterasaun lei foun iha de’it medida foun rua mak hanesan votu postál iha rai-liur, sentru votasaun paralelu, nune’e espera tempu badak PN bele aprova hodi haruka ba Prezidente Repúblika promulga, maibé se PN demora tarde mak eleisaun mai sei uza nafatin lei Eleitorál tuan ne’ebé vigór hela.
“Parlamentu Nasionál sei haree, se tarde demais entaun nafatin uza lei Eleitorál ba PN ne’ebé vigór hela no bele retira tiha lei foun,” nia hateten.
Iha fatin hanesan, Diretór Jerál Sekretáriadu Tékniku Administrasaun Eleitorál (STAE), Acilino Branco, hateten espera katak iha semana ida-ne’e inisíu proposta alterasaun ne’e bele to’o Prezidente Repúblika hodi hetan promulgasaun.
Tanba hafoin promulgasaun mak sei halo ajustamentu lubun ba dekretu Governu sira liuhosi medida foun balun hanesan sentru votasaun paralelu, votu postál iha diáspora, ida-ne’e kontribui tebes garante partisipasaun sidadaun timoroan iha rai-laran no diáspora.
Enkuantu iha loron 06 fevereiru ne’e, PN liuhosi reuniaun plenária aprova iha faze jeneralidade ho votu a-favór 38, kontra 0 no abstensaun 13 ba proposta lei númeru 50/V(5a)-alterasaun dalimak lei númeru 6/2006, 28 dezembru, lei Eleitorál ba PN.
Ho aprovasaun ne’e, Prezidente PN fó fila-fali ba komisaun A atu trata kontinusaun ba diskusaun iha espesialidade prazu semana rua.
Notísia Relevante: Bele uza lei anteriór bainhira diskusaun lei eleitorál ba PN demora
Jornalista : Nelson de Sousa
Editór : Cancio Ximenes
