STAE preparadu realiza eleisaun parlamentár
DILI, 13 fevereiru 2023 (TATOLI)—Diretór Jerál Sekretáriadu Tékniku Administrasaun Eleitorál (STAE), Acilino Manuel Branco, hateten STAE preparadu hodi realiza eleisaun parlamentár ne’ebé sei hala’o iha loron 21 fulan-maiu tinan 2023.
Notísia Relevante: Prezidente Repúblika dekreta loron eleisaun Parlamentár iha 21 maiu
“Ohin, rona rasik Prezidente Repúblika ninia liafuan laiha dúvida, tanba ba iha órgaun eleitorál rua (STAE ho CNE) ninia serbisu. Tanba, órgaun eleitorál rua mós lori ona naran di’ak Timor-Leste ninia hodi apoiu ona prosesu eleitorál sira iha nasaun sira seluk,” Diretór Jerál STAE ne’e hateten ba jornalista sira hafoin partisipa iha Prezidente Repúblika (PR), José Ramos Horta, dekreta loron eleisaun parlamentár 2023 iha Palásiu Prezidensiál Nicolau Lobato, Bairru Pite, segunda ne’e.
Tuir Nia, Prezidente Repúblika dekreta ona loron eleisaun ida-ne’e tama ona siklu eleitorál no iha loron ualu (8) nia laran ne’e, parte STAE sei públika kalendáriu operasaun.
“Prezidente Repúblika dekreta ona, agora ita tama siklu eleitorál ninia dekretu Prezidente Repúblika, ha’u hanoin katak tuir lei eleisaun ne’e rasik iha loron ualu tuir mai STAE sei publika ba kalendáriu opresaun nia. Entaun, hanoin aban, STAE sei haree depois prepara kalendariu operasaun eleitorál depois públika iha jornál Rrepúblika,” nia dehan.
Nune’e, hosi loron eleisaun PR dekreta ona iha loron 21 fulan-maiu, ba prosesu eleitorál ne’e hahú ona, tuir lei sei mínimu loron 80 maibé dekreta ohin aban karik públika iha jornál Repúblika signifika katak iha tan aumenta loron pelumenus 10 ka liu.
Entaun ho tempu ida-ne’e, STAE sei esforsu tomak ho entidade relevante sira bele aselera posivelmente preokupasaun tékniku sira, liu-liu kona-ba lójistika, ekipamentu resensiamentu no mós ba iha ezekusaun orsamentu.
Tuir dadus STAE nian hatudu katak. eleitór foun resensiamentu atuliazadu to’o iha fulan dezembru tinan 2022 ne’e hamutuk 878.786.
Maibé, nia dehan, ho loron eleisaun ne’ebé Prezidente Repúblika dekreta ona, STAE sei halo ajustamentu ba resensiamentu ne’ebé iha tanba tuir lei katak loron 30 antes eleisaun ne’e tenke suspende atendimentu.
STAE mós halo preparasaun halo koordenasaun ho Ministériu Negósiu Estranjeiru no Kooperasaun (MNEK), Ministériu Justisa (MJ), hosi Dirasaun Jerál Notariadu, ekipa sei dezloka ba nasaun sira hanesan Austrália, Korea Súl, Portugál, Inglatera, Irlandia Norte atu halo atendimentu durante fulan ida, hafoin konklui sei kontinua ho nia prosesu sira seluk antes loron 30.
Tan ne’e, entermu tékniku dadus órgaun eleitorál garante eleisaun ida-ne’e sei diferensa ho eleisaun sira seluk.
Notísia Relevante: Resensiamentu eleitorál iha diáspora sei hahú 24 fevereiru 2023
Jornalista : Nelson de Sousa
Editór : Cancio Ximenes
