Autoridade Covalima sei lansa kuda hare iha natar ektare 20
COVALIMA, 14 fevereiru 2023 (TATOLI)–Autoridade Covalima liuhosi Servisu Agrikultura Munisipiu Covalima, sei halo lansamentu kuda hare kuaze ektare 20 iha suku Raimea, postu administrativu Zumalai, munisípiu Covalima.
“Ita nafatin fó asisténsia ba grupu agrikultór sira halo sira-nia toos ho natar ida-ne’e kna’ar prinsipál, hosi dirasaun servisu agrikultuta munisipál nian, foin lalais iha Beilaku halo tan ona estensaun natar kuaze ektare 20 loke foun, nune’e ami orienta ona tékniku sira iha posibilidade halo lansamentu kuda haree iha suku Ramea ne’e,” Diretór Servisu Agrikultura Munisipiu Covalima (SMAC), Domingos Gusmão, hateten ba Agência Tatoli, iha nia kna’ar fatin, Tabakolot, tersa ne’e.
Hafoin halo estensaun natar kauze ektare 20, entaun Sevisu Agrikultura Munisípiu Covalima mós orienta ona tékniku extensionista sira iha terrenu oinsá mak identifika natar posivel bele halo lansamentu kuda haree natar foin loke ne’e kuaze ektare 20.
“Ita halo lansamentu kuda no ita foku ba ida-ne’e fo atendimentu tékniku, nune’e komunidade kontribui hasa’e produsaun,” nia dehan.
Agrikultór sira iha postu administrativu Zumalai fahe ba área sira hanesan Oebaba, Beilaku, Raimea Induk Kulu Oan parte Tashilin no postu administrativu Suai iha área Beco Maucola no Suai Loro ne’ebé iha potensialidade ba agrikultór sira atu halai natar hodi hasa’e produsaun iha rai-laran.
Antes ne’e, iha 27 setembru 2022, Diretór Servisu Agrikultura Munisipál Covalima, Domingos Gusmão, fó sai dadus agrikultór sira kollete ona hare-kulit hodi hasa’e produsaun tonelada 9885.58.
Dadus prelimináriu sira-ne’e mai-hosi estensionista sira rekolla mai hosi postu administrativu Fatumea, Suai no Zumalai ho nia totál área potensiál 12.167, área kultivasaun 2069,35, área produtividade 3.79 ho totál nia produsaun 9885.58.
Tuir observasaun hosi Agênsia Tatoli katak oras ne’e daudaun agrikultór sira iha Covalima hahú fila rai ona no prepara atu halai natar ba époka dahuluk iha munisípiu Covalima.
Jornaista : Celestina Teles
Editór : Cancio Ximenes
